ԱՄՆ սենատոր Բարբարա Բոքսերը կարող է Մեթյու Բրայզայի Ադրբեջանում դեսպան նշանակելու վետոն պահպանել այնքան ժամանակ, որքան հարկ կհամարի: Այս մասին NEWS.am-ի թղթակցի հետ զրույցում նշեց Սինհուա համալսարանին առընթեր (Պեկին) ամերիկաչինական կենտրոնի փորձագետ, ԱՄՆ նախկին նախագահ Բիլ Քլինթոնի վարչակազմի անդամ Դեն Գուտմանը: Ըստ Գուտմանի, ԱՄՆ նախագահը հնարավորություն ունի սենատորի վետոն շրջանցելու Սենատի ընտրությունների ժամանակ, երբ Սենատի նախկին կազմը ցրված է, իսկ նորը դեռ կազմավորված չէ, սակայն գոյություն ունի քանակային սահմանափակում նման դեպքերի համար, երբ պաշտոնատար անձը կարող է անցնել աշխատանքի առանց Սենատի հավանության:
NEWS.am-ը ավելի վաղ հայնել է, որ սենատորներ Բարբարա Բոքսերը եւ Ռոբերտ Մենենդեսը Մեթյու Բրայզայի Ադրբեջանում ԱՄՆ դեսպան նշանակելու վրա վետո էին դրել` պատճառաբանելով, որ ԵԱՀԿ Մինսկի խմբի նախկին համանախագահ Բրայզան մտերիմ կապեր ունի Ադրբեջանի գործող վարչակազմի անդամների հետ:
Նշենք, որ լուրերի համաձայն նույնիսկ Մեթյու Բրայզայի ու նրա կին, ազգությամբ թուրք Զեյնո Բարանի Թուրքիայում տեղի ունեցած ամուսնության ժամանակ թանկարժեք նվերներ են ստացվել Ադրբեջանից: