Թուրքիայում հայտնի հանրահայտ ստամբուլահայ դերասան Միսաք Թորոսը կասկածելի պայմաններում մահացել է Ստամբուլի Բեյօղլու թաղամասում գտնվող «Ազատ եւ ընդունված մասոնների միություն»-ի շենքում։
Թուրքական Haberturk-ի փոխանցմամբ՝ 70-ամյա հայազգի դերասանը «Ազատ եւ ընդունված մասոնների միություն»-ի շենքում վերելակ նստելու ընթացքում վատացել է։ Առաջին օգնությունը ցուցաբերել են շենքի անվտանգության աշխատակիցները։ Դեպքի վայր ժամանած բժիշկները հայտնաբերել են, որ Միսաք Թորոսը արդեն մահացել է։
Բեյօղլուի ոստիկանության աշխատակիցների ուսումնասիրություններից հետո Միսաք Թորոսի մահը գրանցվել է որպես «կասկածելի մահ»։ Որոշ տեղեկություններով՝ հայազգի դերասանը մահացել է սրտի կաթվածից։
Միսաք Թորոսի թաղումը տեղի կունենա նոյեմբերի 10-ին Շիշլիի հայկական գերեզմանոցում։ Հայտնի դերասանի հիշատակի սգո արարողությունը կկազմակերպվի Բեյօղլուի հայկական եկեղեցում։
Թուրքական թատրոնի մեծ դերասան Միսաք Թորոսը խաղացել է մի շարք գեղարվեստական ֆիլմերում, մեծ հեղինակություն վայելող հեռուստասերիալներում, ինչպես նաեւ դասավանդել է արվեստների դպրոցում։