Պատերազմը շատ լուրջ բան է, որպեսզի նրան անլուրջ մոտենանք ու չնայած Ադրբեջանի կողմից հնչող ռազմատենչ հայտարարություններին, այնտեղ մարդիկ սթափ են գնահատում տարածաշրջանում ռազմական հավասարակշռությունը, արտաքին հզոր խաղացողների հնարավոր արձագանքը, ինչպես նաեւ հնարավոր պատերազմի գինը: Այս մասին լրագրողների հետ հանդիպման ժամանակ նշել է Կովկասի ինստիտուտի փոխտնօրեն Սեյգեյ Մինասյանը:
«Պատերազմ սկսելով եւ կարճ ժամկետում չկարողանալով այն ավարտել, Ադրբեջանը ոչ միայն կկորցնի Ղարաբաղը այս կամ այն կերպ վերադարձնելու հույսը, այլ նաեւ կզրկվի Ղարաբաղին հարակից ավելի շատ տարածքներից: Դա նաեւ կլինի ներկա ալիեւյան ռեժիմի վերջը»,- ասել է նա:
Մինասյանն ընդգծել է, որ ոչ մի ռազմական փորձագետ չի կանխատեսում Ադրբեջանի արագ եւ անարյուն հաղթանակը` ռազմական գործողությունների վերսկսման դեպքում: Բլիցկրիկ Ադրբեջանի մոտ չի ստացվի, ավելի հավանական է, որ հակառակն ստացվի:
«Հենց դրա համար էլ մոտ ժամանակներս պատերազմ չի սկսվի, եթե, իհարկե, Ադրբեջանը չկորցնի իրականության զգացումը եւ չորոշի գնալ նման ինքնասպան քայլի:
Եթե խոշորամասշտաբ ռազմական գործողություններ սկսվեն, Ղարաբաղի բանակը ոչ միայն համահարձակման կդիմի, այլեւ հրթիռակոծման կենթարկի Ադրբեջանի կարեւորագույն արդյունաբերական, հաղորդակցական եւ այլ կենսական կարեւոր օբյեկտները: Սա շատ ուժեղ զսպող գործոն է Ադրբեջանի համար»,- ընդգծել է Մինասյանը: