Այսօր` նոյեմբերի 19-ին, ժամը 12:05-ի սահմաններում, Արդարադատության նախարարության Կալանավայրերի վարչության «Կոշ» ՔԿՀ-ում շարունակվել է «Հայկական ժամանակ» թերթի գլխավոր խմբագիր, քաղբանտարկյալ Նիկոլ Փաշինյանի դատավարությունը: Դատավարությունն ընթանում է «Կոշ» ՔԿՀ-ի ռազմագիտության սենյակում:
Ինչպես դատարանի դահլիճից NEWS.am-ին հայտնեց ֆոտոլրագրող Գագիկ Շամշյանը, Նիկոլ Փաշինյանին նշված վարչական շենք բերեցին մենախցից` ձեռնաշղթաներով: Նրան ուղեկցում էին 10-ից ավելի աշխատակիցներ: Ն. Փաշինյանը նշեց, որ պայքարելու է մինչեւ վերջ, մեր բոլորի երազած Հայաստանի ու մեր երեխաների, քաղբանտարկյալների ազատության համար:
Դատականի նիստի ժամանակ ե՜ւ Նիկոլ Փաշինյանը ե՜ւ նրա փաստաբան Երվանդ Վարոսյանը միջնորդություններ ներկայացրեցին, որ որպես վկա դատարան հրավիրվի Արդարադատության նախարարության «Նուբարաշեն» ՔԿՀ-ի պետ Տիգրան Նավասարդյանը եւ գլխավոր դատախազության պաշտոնյա Վարդան Մարտիրոսյանը: Դատարանում դատախազության շահերը ներկայացնող Վարդան Մարտիրոսյանի տեղակալ Հակոբ Մարտիրոսյանը Փաշինյանի եւ նրա փաստաբանի միջնորդությանը ոչ դեմ արտահայտվեց, ոչ` կողմ, այլ թողեց, որ դատավորն ինքը որոշի:
Դատավոր Սուրեն Մնոյանը մերժեց այդ միջնորդությունը` այն համարելով անհիմն:
Դրանից հետո Նիկոլ Փաշինյանը շուրջ 15 րոպեանոց ելույթ ունեցավ եւ հայտարարեց, որ իր նկատմամբ կատարվում է քաղաքական հաշվեհարդար եւ այդ ամենը կազմակերպված է Սերժ Սարգսյանի եւ Աղվան Հովսեփյանի կողմից: Դատավոր Սուրեն Մնոյանը հայտարարեց, որ ինքը գնում է խորհրդակցական սենյակ եւ վճիռը կկարդա 30 րոպեից: Վերադառնալով, դատավորը որոշեց մերժել Նիկոլ Փաշինյանի եւ նրա փաստաբան Երվանդ Վարոսյանի միջնորդությունը:
Դատավճռի հրապարակումից հետո, Փաշինյանն ու նրա փաստաբանը հայտարարեցին, որ բողոքարկելու են վճիռը վերաքննիչ դատարանում:
Նշենք նաեւ, որ Արագածոտնի մարզի ընդհանուր իրավասության դատարանը քննում էր Նիկոլ Փաշինյանի բողոքն ընդդեմ «Նուբարաշեն» ՔԿՀ-ի պետ Տիգրան Նավասարդյանի: Դատարանը պետք է որոշեր՝ փոխելո՞ւ է Նովասարդյանի կողմից այս տարվա մայիսի 25-ին կայացված որոշումը:
Ըստ այդ որոշման՝ կիրառելով 2009 թվականի մայիսի 19-ին ՀՀ ԱԺ-ի ընդունած համաներումը, Փաշինյանի ազատազրկման վերջնաժամկետը սահմանել է 3 տարի 10 ամիս 29 օր: Առաջնորդվելով ՀՀ օրենսդրությամբ, Նավասարդյանը Նիկոլ Փաշինյանի նկատմամբ կայացված դատավճռի 7 տարվա ազատազրկման ժամկետը պետք է կիսեր՝ վերջնաժամկետ սահմանելով 3 տարի 6 ամիս:
Լուսանկարները` Գագիկ Շամշյանի