Երեւանի քաղաքապետարանը հերթական` 35-րդ անգամ մերժել է դեկտեմբերի 10-ին «Ազատության» հրապարակում հանրահավաք անցկացնելու մասին ընդդիմության ներկայացրած իրազեկման դիմումը: Այս անգամ էլ, նախորդների նման, պատճառաբանությունը եղել է այն, որ հոկտեմբերի կեսից հրապարակում հուշանվերների տոնավաճառ է անցկացվում:
Քաղաքապետարանում այս խնդրի վերաբերյալ քննարկմանը մասնակցել է ՀԱԿ համագարգող Լեւոն Զուրաբյանը, ով նշել է, որ Ազատության հրապարակը ընդգրկված չէ այն վայրերի ցանկում, որտեղ հանրահավաքների անցկացման սահմանափակում կա, այսինքն այնտեղ հանրահավաք անցկացնելն արգելված չէ:
Նրա ներկայացմամբ, իրենք դեկտեմբերի 10-ին` երթ են անցկացնելու մարդու իրավունքների պաշտպանության միջազգային օրվա կապակցությամբ (այդ մասին իրազեկումը քաղաքապետարանն ընդունել է ի գիտություն), իսկ հանրահավաքի անցկացնելու մասին դեռ հստակ որոշում չկա:
Նշենք, որ քաղաքապետարանում կայացած քննարկմանը մասնակցել է նաեւ Հայաստանում ԱՄՆ-ի դեսպանության աշխատակիցը:
Հատկանշական է, որ «Ազատության» հրապարակում հուշանվերների տոնավաճառը բացվել է հոկտեմբերին եւ նշվել, որ այն տեւելու է 20 օր, այնինչ մինչ օրս այնտեղ գործում է այդ տոնավաճառը: Քաղաքապետարանում հայտնել են, որ այն գործելու է մինչեւ դեկտեմբերի 5-ը, իսկ դեկտեմբերի 6-ից հրապարակում ամանորի նախապատրաստական աշխատանքներ կսկսվեն:
