«Հզոր Թուրքիա» կուսակցությունը, որը Հայաստանի հետ առանց նախապայմանների հարաբերություններ հաստատելու նախաձեռնությամբ է հանդես գալիս, քաղաքական դաշտում իրենից ոչինչ չի ներկայացնում։ Այս մասին գրել է թուրքական «Ջումհուրիեթ» թերթի քաղաքական մեկնաբան Լեյլա Թավշանօղլուն։
Նրա խոսքով՝ «Հզոր Թուրքիայում» հավաքվել են մարդիկ, ովքեր պարզապես ցանկանում են գումար կորզել ցանկացած միջոցառումից։ «Այս կուսակցության նախագահ Թունա Բեքլեւիչը նույնիսկ հաջողացրել է իր համար գումար կորզել «Ստամբուլ-Եվրոպական մշակույթի մայրաքաղաք 2010» միջացառումից։ Այսինքն Թունա Բեքլեւիչն ու նրա «ջահելները» նպատակ ունեն ամեն ինչից եւ ամեն գնով գումարներ աշխատել։ Նրանք վերջերս փորձում են «Արդարություն եւ զարգացում» իշխող կուսակցության դաշնակից դառնալ, բայց ջանքերն ապարդյուն են»,- գրում է Թավշանօղլուն՝ ադրբեջանական հասարակությանը խորհուրդ տալով չմտահոգվել եւ ուշադրություն չդարձնել «Հզոր Թուրքիայի» վրա։
Ավելի վաղ NEWS.am-ը հայտնել էր, որ հոկտեմբերի 10-ին թուրքական մամուլը հոդվածներ եւ նկարներ է հրապարակել, Հայաստանի սահմանը խախտած թուրք «բարի կամքի դեսպանների» վերաբերյալ։ Լուսանկարներում պատկերված էին «Հզոր Թուրքիայի» նախագահ Թունա Բեքլեւիչն ու նրա մի քանի կուսակիցներ՝ Թուրքիայի եւ Հայաստանի սահմանը խախտելիս։
Հայաստանում Ռուսաստանի դաշնային անվտանգության ծառայության սահմանապահ բաժնի պետի տեղակալ Անդրեյ Գուզեեւը հերքել էր թուրքական լրատվամիջոցների տարածած տեղեկությունը։
Հոկտեմբերի վերջին օրերին Բեքլեւիչն ու նրա ուղեկիցները այցելել էին Հայաստան, որից հետո հրավիրվել էին Հայաստանի ազգային անվտանգության ծառայություն։ Ծառայությունում Բեքլեւիչին խորհուրդ էին տվել լքել Հայաստանը։ Թուրք երիտասարդ կուսակցականը հետեւել էր Հայաստանի ԱԱԾ աշխատակիցների խորհրդին, բայց Թուրքիա հասնելուն պես հայտարարել էր, որ կրկին այցելելու է Հայաստան։
