Հայաստանի ԳԱԱ ակադեմիկոսների եւ թղթակից անդամների ընտրությունների հայտերի ներկայացման գործընթացն արդեն ավարտվել է։ Ակադեմիկոսների 6 թափուր տեղերի համար հայտ են ներկայացրել 11 գիտնականներ, իսկ թղթակից անդամների 22 թափուր տեղերի համար` 69 գիտնականներ։ Այս մասին դեկտեմբերի 2-ին լրագրողների հետ հանդիպման ժամանակ ասաց ՀՀ ԳԱԱ նախագահ Ռադիկ Մարտիրոսյանը՝ նշելով, որ դեկտեմբերի 27-28-ին ՀՀ ԳԱԱ-ում կընթանան ակադեմիկոսների եւ թղթակից անդամների ընտրություններ։
Ռ. Մարտիրոսյանի խոսքով՝ 2002 թվականին ընդունված կանոնադրության համաձայն ընտրությունները պետք է կատարվեն 3 տարին մեկ։ Սակայն վերջին անգամ ակադեմիայում ընտրություններ կատարվել են 2006 թվականին, իսկ ընտրությունների ուշացումը ըստ Ռ. Մարտիրոսյանի՝ պայմանավորված է ֆինանսական ճգնաժամով:
Նրա խոսքով՝ ԳԱԱ ակադեմիկոս անդամներն ստանում են 150 հազար դրամ, իսկ թղթակից անդամները՝ 100 հազար դրամ:
ՀՀ ԳԱԱ նախագահը ներկայացրեց նաեւ այն հիմնական պահանջները, որոնք ներկայացվում են առաջադրված թեկնածուներին:
«Բացի խոշոր գիտական ձեռքբերումներից ուշադրություն է դարձվում նրանց գիտական աշխատությունների համապատասխանությանը այն առաջնահերթություններին, որոնք անհրաժեշտ է զարգացնել մեր երկրում, ինչպես նաեւ կրթության ոլորտում նրանց վաստակին»,-ասաց Ռ. Մարտիրոսյանը: