Ստամբուլահայ հայտնի տնտեսագետ Տարոն Աջեմօղլուն հնարավոր է ներկայացվի Նոբելյան մրցանակի:
Այս մասին տեղեկացնում է թուրքական Milliyet-ը՝ վկայակոչելով Bloomberg-ին, որի հրապարակման մեջ ԱՄՆ-ում աշխատող հայազգի տնտեսագետը ներկայացվել է աշխարհի լավագույն 20 տնտեսագետների շարքում։
Թուրքական պարբերականը ուշադրություն է դարձրել այն հանգամանքի վրա, որ Տարոն Աջեմօղլուն կլինի Նոբելյան մրցանակ ստացած Թուրքիայի 2-րդ քաղաքացին՝ գրող Օրհան Փամուկից հետո։
Ավելի վաղ, ստամբուլահայ Տարոն Աջեմօղլուն, ով ներկայումս դասախոսում է Մասաչուսեթսի տեխնոլոգիական ինստիտուտում, հայտնվել էր ամերիկյան հայտնի Foreign Policy ամսագրի կողմից ներկայացրած համաշխարհային ինտելեկտուալների 100 հոգանոց ցուցակի մեջ:
NEWS.am-ը ավելի վաղ հայտնել էր, որ Թուրքիայի արտգործնախարար Ահմեդ Դավութօղլուն Թուրքիա էր հրավիրել հայազգի Տարոն Աջեմօղլուին
Milliyet-ի հետ հարցազրույցի ժամանակ, Տարոն Աջեմօղլուն նշել էր, թե երբեք Դավութօղլուի հետ չի հանդիպել, միայն հեռախոսով է հետը խոսել։
«Հուսով եմ, առաջիկայում Թուրքիա կվերադառնամ եւ նրա հետ մոտիկից կծանոթանամ»-նշել էր հայազգի տնտեսագետը:
Տարոն Աջեմօղլուն ծնվել է 1967-ին, Ստամբուլում։ 1986-ին ավարտել է Գալաթասարայի ավագ դպրոցը։ Այնուհետ, ավարտել Լոնդոնի «Յորք» համալսարանը եւ դոկտորական պաշտպանել Լոնդոնի Տնտեսագիտության դպրոցում։ 1993-ին համալրել է Մասաչուսեթսի տեխնոլոգիական ինստիտուտի մասնագետների շարքը՝ 2000-ին ստանալով պրոֆեսորի կոչում։
Տարոն Աջեմօղլուն, IDEAS/RePec տնտեսագիտական վերլուծական կազմակերպության կողմից հրապարակված տվյալների համաձայն, աշխարհում ամենաշատ վկայակոչվող 20 տնտեսագետների մեջ է մտնում՝ զբաղեցնելով 8-րդ տեղը, երբ Նոբելյան մրցանակի դափնեկիր պրոֆ. Փոլ Կրուգմանը այդ ցուցակում 13-րդ տեղն է։
