«Չեմ կարծում, որ մոտ ժամանակներս ղարաբաղյան հակամարտության կարգավորման հարցում փոփոխություններ կլինեն. դա վերաբերում է նաեւ պատերազմի վերսկսման հավանականությանը»,-NEWS.am-ի թղթակցի հետ զրույցում ասաց գեներալ-գնդապետ Գուրգեն Դալիբալթայանը՝ մեկնաբանելով այն հարցը, թե օրերս Աստանայում կայացած ԵԱՀԿ գագաթաժողովից հետո որքա՞ն հավանական է Ադրբեջանի կողմից պատերազմի վերսկսումը։
Նրա խոսքով, Ադրբեջանն, ամեն դեպքում, պատերազմ չի սկսի, քանի որ հաշվի է նստում գերտերությունների կարծիքի հետ, իսկ գերտերությունները խնդիր են դրել հարցը լուծել խաղաղ ճանապարհով։ «Առաջին հերթին, այդ երկիրը պատրաստ չէ պատերազմ սկսելուն։ Նյութատեխնիկական առումով, իհարկե, պատրաստ է, սակայն այլ առումներով՝ ոչ։ Ադրբեջանցիները դեռ ուշքի չեն եկել կրած պարտությունից հետո։ Նրանք լավ գիտեն,թե ինչի են ընդունակ հայ զինվորականները եւ ինչի՝ ադրբեջանցիները»,- ամփոփեց Դալիբալթայանը։