Հայաստանի փոխվարչապետ, տարածքային կառավարման նախարար Արմեն Գեւորգյանը Քուվեյթի Պետություն աշխատանքային այցի շրջանակում այսօր՝ դեկտեմբերի 9-ին հանդիպել է Քուվեյթի նավթի եւ տեղեկատվության նախարար շեյխ Ահմեբ ալ Սաբահի հետ:
ՏԿՆ մամուլի ծառայությունից NEWS.am-ին հայտնում են, որ կողմերը քննարկել են էներգետիկայի, հատկապես` վերականգնվող էներգետիկայի բնագավառում գործակցությանը վերաբերող հարցեր: Նշելով, որ Հայաստանը թեեւ հարուստ չէ վառելիքաէներգետիկ պաշարներով, փոխվարչապետը միաժամանակ ընդգծել է, որ տնտեսության մի շարք ոլորտներ` զբոսաշրջության, տեղեկատվական տեխնոլոգիաների, գյուղատնտեսության, զարգացման մեծ ներուժ ունեն: Նա Քուվեյթի գործընկերոջը հրավիրել է Հայաստան` գործարար եւ ներդրումային միջավայրին անձամբ ծանոթանալու համար: Երկուստեք կարեւորվել է հայ-քուվեյթական միջկառավարական հանձնաժողովի ստեղծման անհրաժեշտությունը, որը կնպաստի առեւտրատնտեսական եւ հումանիտար հարաբերությունների աշխուժացմանը:
Այցի շրջանակում փոխվարչապետն այցելել է նաեւ Քուվեյթի առեւտրա-արդյունաբերական պալատ, հանդիպել պալատի ղեկավարության հետ: Կողմերը քննարկել են երկու երկրների միջեւ առեւտրատնտեսական կապերի աշխուժացմանը վերաբերող հարցեր: Կարեւորվել է գործարարների ուղիղ շփումների, փոխայցելությունների, գործարար համաժողովների կազմակերպումը` գործակցության հետագա ուղղությունները նախանշելու, միմյանց հնարավորություններին ծանոթանալու նպատակով: Նշվել է, որ հիմնականում ներմուծող երկիր համարվող Քուվեյթի շուկան բաց է հայկական ապրանքատեսակների համար: Միաժամանակ կարեւորվել է ապրանքների տեղափոխման ճիշտ ռազմավարության որոշումը:
Անդրադարձ է եղել նաեւ Քուվեյթում հայկական աշխատուժի ներգրավման, շինարարական նախագծերի իրականացմանը հայկական ընկերությունների մասնակցության հնարավորություններին:
