Ամբողջ Սամցխե-Ջավախքի տարածքում այսօր ծառայում են 5 հայ հոգեւորական: Հայ Առաքելական եկեղեցու Վիրահայոց թեմի տակ գործող Սամցխե- Ջավախք-Ծալկա տարածաշրջանի Ջավախքի ընդհանուր Առաջնորդական փոխանորդությունը մինչեւ օրս չունի առանձին թեմի կարգավիճակ:
Ախալցխայի հոգեւոր հովիվ Տեր Մանուկ քահանան նշում է, որ Ջավախքի հոգեւոր ոլորտն ունի շատ լուրջ խնդիր՝ առաջին հերթին հոգեւորականների պակասը:
«Ես ծառայելով այս տարածաշրջանում, ինձ զգում եմ գրեթե միայնակ, որովհետեւ չկան հոգեւորականներ: Մենք այսօր 8-9 հոգեւորականների կարիք ունենք, շատ եկեղեցիներ կան, որոնք գտնվում են անմխիթար վիճակում: Այս Սուրբ Գրիգոր Լուսավորիչ եկեղեցին էլ, երբ ես եկա ծառայության, գտնվում էր չափազանց անմխիթար վիճակում: Եկեղեցին չուներ ոչ կոնկրետ իրեն պատկանող տարածք, ոչ պարիսպ»,- նշել է նա ու հավելել. «Ջավախքի բազմաթիվ եկեղեցիներ ավերակ վիճակում են գտնվում, վերանորոգվում են միայն անհատների կողմից: Վերանորոգելով եկեղեցիները, Ջավախքում կարող ենք փրկել հայկական պատմաճարտարապետական հուշարձանները»:
Տեր Մանուկ քահանան ամսվա մեջ տարբեր օրերին հասցնում է լինել գյուղերում եւ մատուցել պատարագ, քանի որ ըստ նրա, Ախալցխայում հավատացյալ, եւ եկեղեցի հաճախող մարդկանց թիվը կրկնապատկվել է: