Հայաստանում մարդու իրավունքների պաշտպանության հարցում աղետալի վիճակ է: Դեկտեմբերի 10-ին, մարդու իրավունքների օրը, Սարյանի արձանի մոտ օրվա առթիվ կազմակերպված հանրահավաքի ժամանակ այս մասին հայտարարեց Հայ ազգային կոնգրեսի անդամ, «Ժողովրդավարական հայրենիք» կուսակցության առաջնորդ Պետրոս Մակեյանը:
«Մենք բոլորս իրար հետ ականատես ենք եղել այն վիճակին, որին հասել ենք այսօր տասը տարի շարունակ: Հատկանշական է հատկապես 2008 թվականի փետրվարից հետո ստեղծված իրավիճակը, բայց այս իրավիճակի համար պատասխանատու է ոչ միայն ավազակախումբը` իր սափրագլուխներով, այլեւ մենք, այստեղ գտնվողներս, մեր հասարակությունը»,-ասաց Մակեյանը:
ՀԱԿ համակարգող Լեւոն Զուրաբյանն էլ իր հերթին ասաց. «Անցած տարի դեկտեմբերի 10-ին ես ասացի, որ իրավունքները ոչ ոք չի նվիրում, իրավունքները ձեռք են բերում, ստանում, ոչ ոք ազատություն չի նվիրում: Ազատությունը վերցնում են, նվաճում են: Այս մեկ տարվա պայքարում մենք ցույց տվեցինք, որ միայն պայքարով ենք նվաճելու բոլոր ազատությունները եւ ազատելու ենք մեր բոլոր քաղբանտարկյալներին»,-ասաց Լեւոն Զուրաբյանը` շարունակելով. «Քաղբանտարկյալների ազատելը միայն առաջին գործն է, դրանց հետո
մենք պետք է վերականգնենք մեր իրավունքները կապված մամուլի ազատության հետ, հեռուստատեսությունը դարձնենք ազատ, իսկ դրանից հետո, մենք ժողովրդին վերադարձնենք սեփական իշխանություններին ընտրելու իրավունքը»:
