Դեկտեմբերի 13-ին Բրյուսելում տեղի է ունեցել ԵՄ Արեւելյան գործընկերության արտգործնախարարների երկրորդ հանդիպումը, որին մասնակցել է ՀՀ պատվիրակությունը` ԱԳ նախարար Էդվարդ Նալբանդյանի գլխավորությամբ:
ԱԳՆ մամուլի ծառայությունից NEWS.am-ին հայտնում են, որ Եվրահանձնաժողովի փոխնախագահ, ԵՄ միասնական արտաքին եւ պաշտպանական քաղաքականության բարձր ներկայացուցիչ Քեթրին Էշթոնի նախագահությամբ անցած նիստին ներկա են եղել Արեւելյան գործընկերության ծրագրում ընդգրկված 6 երկրների եւ ԵՄ 27 անդամ երկրների ԱԳՆ ղեկավարները, Եվրահանձնաժողովի եւ ԵԽ-ի, Եվրոպական խորհրդարանի բարձրաստիճան ներկայացուցիչներ:
Հանդիպմանը ելույթով հանդես է եկել ՀՀ ԱԳ նախարարը եւ կարեւորել Ասոցիացման համաձայնագրի կնքման վերաբերյալ բանակցությունների մեկնարկը եւ հաջող ընթացքը, նշելով, որ հուլիսից ի վեր տեղի են ունեցել բանակցությունների 2 փուլ եւ 7 տեսակոնֆերանս, իսկ երկու օրից Երեւանում տեղի է ունենալու բանակցությունների երրորդ փուլը: Էդվարդ Նալբանդյանը ընդգծել է նաեւ Հայաստանի շահագրգռվածությունը ակտիվորեն շարունակելու խորացված ու համապարփակ ազատ առեւտրի գոտու ստեղծման ուղղված աշխատանքները:
Անդրադառնալով մուտքի արտոնագրային ռեժիմի ազատականացմանը, ԱԳՆ ղեկավարը նշել է, որ Հայաստանը պատրաստակամ է շրջանակային փաստաթուղթ ստորագրել արտոնագրային ռեժիմի դյուրացման եւ ռեադմիսիայի վերաբերյալ եւ ակնկալում է, որ այն հնարավորինս շուտ կկնքվի:
Անդրադառնալով հակամարտությունների հանգուցալուծմանը, Էդվարդ Նալբանդյանը մեջբերելով ԵԱՀԿ Աստանայի գագաթաժողովի հռչակագրում ամրագրված դրույթը, որ հակամարտությունները պետք է լուծվեն խաղաղ միջոցներով եւ գործող ձեւաչափերում` միջազգային իրավունքի նորմերի եւ սկզբունքների հիման վրա, շեշտել է, որ կարգավորմամբ զբաղվող միջազգային մանդատ ունեցող կառույցները կուտակել են լուրջ փորձառություն եւ կարող են ծառայել որպես կարգավորման գործուն եւ արդյունավետ մեխանիզմ:
Արտգործնախարարները անդրադարձել են հաջորդ տարվա մայիսի 27-ին Բուդապեշտում կայանալիք Արեւելյան գործընկերության գագաթաժողովի նախապատրաստական աշխատանքներին:
