Եվրահանձնաժողովը մտադիր է հավանություն տալ Հայաստանի եւ Ադրբեջանի հետ վիզային ռեժիմի պարզեցման բանակցությունները 2011-ին անցկացնելու առաջարկին: Դեկտեմբերի 13-ին Ստրասբուրգում, Եվրախորհրդարանի նիստում այդ մասին հայտարարել է Եվրամիության ներքին գործերի հանձնակատար Սեսիլիա Մալմստրյոմը:
УНИАН-ը հաղորդում է, որ «Արեւելյան գործընկերության» երկրներից այժմ ԵՄ-ի հետ պարզեցված ռեժիմ ունեն միայն Ուկրաինան ու Մոլդովան: Ավարտին է մոտենում Վրաստանի հետ գործընթացը: Առաջիկայում Եվրահանձնաժողովը մտադիր է բանակցություններ սկսել Բեալռուսի հետ:
Ռեժիմի պարզեցումը նախատեսում է վիզայի վճարի կրճատում 60-ից մինչեւ 35 եվրո, քաղաքացիների որոշ խմբերի համար անվճար վիզա, դիվանագիտական անձնագիր ունեցողների առանց վիզայի մուտք Եվրամիություն, վիզայի տրամադրման, կամ մերժման ժամկետների հստակեցում:
