NEWS.am-ի աղբյուրները փոխանցում են, քիչ առաջ զբաղեցրած պաշտոնից ազատվել է ՀՀ էկոնոմիկայի նախարար Ներսես Երիցյանը: Նրան այդ պաշտոնում կփոխարինի ՀՀ ֆինանսների նախարար Տիգրան Դավթյանը։ Ֆինանսների նախարարի պաշտոնում էլ նշանակվելու է ՀՀ Կենտրոնական բանկի փոխնախագահ Վաչե Գաբրիելյանը։ Ըստ տարբեր աղբյուրներից ստացվող տեղեկությունների՝ առաջիկայում սպասվում է նաեւ ՀՀ գյուղատնտեսության նախարար Գերասիմ Ալավերդյանի, բնապահպանության նախարար Արամ Հարությունյանի եւ մի քանի այլ նախարարների պաշտոնանկությունը։
Ի դեպ, NEWS.am-ը քիչ առաջ կապվեց Երիցյանի օգնական Արման Գիլոյանի հետ՝ ճշտելու նախարարի պաշտոնանկության մասին լուրի իսկությունը: Վերջինս ասաց, թե առաջին անգամ է լսում այդ մասին, իսկ նախարարը ներկա պահին գտնվում է վարչապետի մոտ՝ խորհրդակցության: Նախարարի մամուլի խոսնակ Սյուզաննա Հայրապետյանն էլ ասաց, որ դեռեւս պաշտոնապես որեւէ տեղեկություն չկա նախարարի հրաժարականի մասին եւ լուրն ստանալուն պես այն կտեղադրվի նախարարության կայքէջում: Իսկ նախարարությունը շարունակում է իր բնականոն աշխատանքը: