Վրաստանի նախագահ Միխայիլ Սահակաշվիլին համարում է, որ իր երկրի տնտեսական կայունության ամենագլխավոր սպառնալիքը համաշխարհային արժեզրկումն է: Դեկտեմբերի 17-ին Վրաստանի կառավարության արտագնա նիստում, որը կայացել է Սատապլիայի քարանձավներում, Սահակաշվիլին հայտարարել է, որ արժեզրկումը հանգեցնում է նավթի ու մթերքների գների աճի:
«Գներն ամեն օր մեզ հարվածում են ավելի ու ավելի ցավագին: Մեր սահմանափակ հնարավորություններով, մենք պետք է անենք ամեն ինչ, մշակենք ծրագրեր, որպեսզի թեթեւացնենք բնակչության, հատկապես անապահով խավի հոգսերը, մեղմացնենք համաշխարհային արժեզրկման ալիքի ազդեցությունը»,- ասել է նա:
Նախագահը հանձնարարել է կառավարությանը այդ խնդիրները լուծելու համար մոբիլիզացնել պահուստային ֆոնդի միջոցները եւ կրկին անգամ կոչ է արել կրճատել վարչական ծախսերը:
Վարչապետ Նիկա Գիլաուրիի խոսքով, առաջիկա շաբաթում այդ ուղղությամբ ծրագիր կմշակվի, որը կիրականացվի հունվար-փետրվար ամիսներին: