Տեսականորեն դեռեւս հնարավորություն կա, որ ԱՄՆ Կոնգրեսի Ներկայացուցիչների պալատի նիստի օրակարգում ընդգրկվի հայոց ցեղասպանության վերաբերյալ 252-րդ բանաձեւը: Դեկտեմբերի 22-ին լրագրողների հետ հանդիպման ժամանակ այս մասին ասաց Ամերիկայի հայկական համագումարի տարածաշրջանային գրասենյակի ղեկավար Արմինա Դարբինյանը:
«Մենք մեր ձեռքերը չենք իջեցնում: Անկախ նրանից կդրվի օրակարգում, կքվեարկվի թե՝ ոչ, մենք շարունակելու ենք մեր նպատակաուղղված աշխատանքը»,-ասաց Դարբինյանը:
Նրա խոսքով, ցեղասպանության ճանաչման բանաձեւի ընդունումը կարեւոր է հենց ԱՄՆ-ի եւ, մասնավորապես, նախագահ Բարաք Օբամայի համար:
«Սա այն խնդիրը չէ, որը խարխուլ հիմքերի վրա է, եւ մենք փորձենք օգտագործել հակասությունները թուրք-իսրայելական լոբբիների միջեւ, նպաստավոր պահ գտնենք բանաձեւն անցկացնելու համար: Սա մարդու իրավունքների հետ առնչվող այն սկզբունքային խնդիրն է, որին անկախ քաղաքական զարգացումներից պետք է ճիշտ ու մաքուր ճանապարհով հասնել»,-ասաց Ամերիկայի հայկական համագումարի տարածաշրջանային գրասենյակի ղեկավարը:
«Եթե ԱՄՆ-ը հավակնում է կրել ժողովրդավար երկրի տիտղոսը, ապա սա նրանց հետաքրքրություններից պետք է բխի, որպեսզի նրանց բարոյական կերպարը համոզիչ լինի»,- ընդգծեց նա:
Դարբինյանի կարծիքով, բանաձեւը Կոնգրեսի օրակարգ չմտավ, որովհետեւ ԱՄՆ ընտրություն կատարեց շահի եւ բարոյականության միջեւ:
«Ամերիկայի հայկական համագումարը փորձում է բանաձեւի ընդունումը չկապել հայ-թուրքական հարաբերությունների եւ ոչ էլ նունիսկ ղարաբաղյան հակամարտության լուծման հետ՝ թուրք-իսրայելական հարաբերությունների վատացման կոնտեքստում: Մեզ փորձում են գործիք դարձնել, մենք պետք է փորձենք չդառնալ»,- իր խոսքն ամփոփեց Դարբինյանը:
