2010 թվականը նշանավորվեց ճգնաժամային 2009-ից հետո արձանագրված տնտեսական աճով: NEWS.am-ի թղթակցի հետ զրույցում նման կարծիք է հայտնել հանրապետական պատգամավոր, Զանգեզուրի պղնձա-մոլիբդենային կոմբինատի սեփականատեր Վահե Հակոբյանը:
Նրա խոսքով, ճգնաժամի ժամանակ հանրապետությունը համախմբեց իր բոլոր պահուստները` դրանք բաժանելով ըստ ոլորտների, որպեսզի ճիշտ կիրառի տնտեսական պոտենցիալը:
«Կարծում եմ` կառավարությունը ճիշտ արձագանքեց, եւ 2010-ին այդ ռազմավարության արդյունքներն արդեն իրենց պտուղները տվեցին: Իսկ դա նշանակում է, որ Հայաստանը 2011թ. կմտնի վստահ եւ համախմբված ռեսուրսներով»,- ասել է պատգամավորը: Նա նաեւ վստահություն է հայտնել, որ 2011-ին տնտեսության տարբեր ոլորտներում կայուն եւ դինամիկ աճ է արձանագրվելու:
«Վստահ եմ, որ ռազմավարական ու համակարգային ոլորտներում բարենպաստ միջավայր կստեղծվի միջին եւ փոքր բիզնեսի զարգացման համար: Իսկ որոշակի օրենսդրական բարեփոխումների դեպքում կապահովի հայկական տնտեսության թռիչքը»,- ամփոփել է Հակոբյանը: