2010 թվականի ընթացքում Հայաստանի կարեւորագույն ձեռքբերումներից մեկը դարձավ Հայաստանի միջազգային իմիջի բարձրացումը: NEWS.am-ի թղթակցի հետ զրույցում այս մասին ասաց Հայաստանի Հանրապետական կուսակցության քարտուղար Էդուարդ Շարմազանովը:
Նրա խոսքով, դրա վկայությունն է այն, որ Հայաստանին հրավիրեցին Վաշինգտոնում անցկացված միջուկային անվտանգության գագաթաժողովին:
«Դա նշանակում է, որ նույնիսկ այդ ոլորտում աշխարհը կարեւոր նշանակություն է տալիս մեր երկրին»,-ասաց Շարմազանովը:

2010 թվականի երկրորդ կարեւորագույն իրադարձությունն, ըստ նրա, ԱՄՆ պետքարտուղար Հիլարի Քլինթոնի այցելությունն էր Հայաստան, որի ընթացքում նա բառացիորեն կրկնեց հայ-թուրքական հարաբերությունների վերաբերյալ Հայաստանի նախագահ Սերժ Սարգսյանի խոսքերը, որ «գնդակը գտնվում է Թուրքիայի դաշտում»:

«Կարեւոր են նաեւ Հայաստանի ձեռքբերումները Աստանայում կայացած ԵԱՀԿ գագաթաժողովին, որի ընթացքում եւս մեկ անգամ պարզ դարձավ, որ միջազգային հանրության դիրքորոշումը համապատասխանում է հայկական կողմի դիրքորոշմանը»,-նշեց Շարմազանովը` հավելելով, որ Հայաստանի ձեռքբերումների շարքին կարելի է դասել նաեւ Հայաստանում ռուսական ռազմաբազայի տեղակայման ժամկետների հետաձգումը:

Նա նաեւ նշեց, որ 2010 թ-ի ընթացքում համաշխարհային տնտեսական ճգնաժամից հետո կայունացավ Հայաստանի տնտեսական վիճակը:

Իսկ բացթողումներից իշխող կուսակցության ներկայացուցիչը նշեց կաշառակերությունն ու օրենքների ոտնահարումը:

«Սակայն կարեւոր է, որ երկրի իշխանությունը նոր եռանդով փորձում է արմատախիլ անել արդեն արմատացած բացասական երեւույթները»,-ամփոփեց պատգամավորը: