Հայաստանի 10 լավագույն մարզիկների մեծարման ավանդական երեկոն եզրափակեց մրցաշրջան-2010-ը: Ամենամյա արարողությանն ավանդույթի համաձայն ներկա է եղել նաեւ երկրի նախագահը: Սերժ Սարգսյանը շնորհավորել է մարզիկներին Ամանորի եւ Սուրբ ծննդյան տոների կապակցությամբ, մաղթել նոր հաղթանակներ եւ հանձնել է պարգեւներ:
Հանրապետության նախագահի հրամանագրով` ֆիզիկական կուլտուրայի եւ սպորտի զարգացման գործում ներդրած նշանակալի ավանդի համար Երեւանի օլիմպիական հերթափոխի պետական մարզական քոլեջի գլխավոր տնօրեն, Հայաստանի ազգային օլիմպիական կոմիտեի փոխնախագահ Դերենիկ Գաբրիելյանը պարգեւատրվել է «Հայրենիքին մատուցած ծառայությունների համար» 1-ին աստիճանի մեդալով, իսկ ՀՀ սպորտի եւ երիտասարդության հարցերի նախարարի տեղակալ, Հայաստանի ծանրամարտի ֆեդերացիայի նախագահ Սամվել Խաչատրյանը` Մովսես Խորենացու մեդալով:
Սերժ Սարգսյանի այլ հրամանագրով, ֆիզիկական կուլտուրայի եւ սպորտի զարգացման գործում ունեցած մեծ վաստակի համար բռնցքամարտի օլիմպիական մանկապատանեկան մարզադպրոցի տնօրեն Սուրեն Ղազարյանն արժանացել է ֆիզիկական կուլտուրայի եւ սպորտի վաստակավոր գործչի կոչման: Հունահռոմեական ըմբշամարտի մարզիչ Գեւորգ Ալեքսանյանը, ձյուդոյի մարզիչ Արթուր Գեւորգյանը, թեքվոնդոյի մարզիչ Գեւորգ Դանիելյանը, ծանրամարտի մարզիչ Էդուարդ Կիզողյանը, ծանրամարտի մարզիչ Արտակ Ներսիսյանը, սպորտային մարմնամարզության մարզիչ Սոս Սարգսյանն արժանացել են վաստակավոր մարզչի կոչման:
Նախագահ Սերժ Սարգսյանի կարգադրությամբ` ֆիզիկական կուլտուրայի եւ սպորտի զարգացման գործում ներդրած նշանակալի ավանդի համար Հայաստանի սպորտային մարմնամարզության հավաքականի գլխավոր մարզիչ Հակոբ Գրիգորյանը պարգեւատրվել է ՀՀ նախագահի շնորհակալագրով:
ՀԱՕԿ նախագահ Գագիկ Ծառուկյանը տարվա լավագույն 10 մարզիկներից յուրաքանչյուրին նվիրել է ավտոմեքենա:
