Երեւանի նորընտիր քաղաքապետ Կարեն Կարապետյանը որոշել է մի ամբողջ շարք նորամուծություններ իրականացնել քաղաքապետարանում:
Մասնավորապես, NEWS.am-ի քաղաքապետարանի աղբյուրը հայտնում է, որ Կարապետյանը հրահանգել է քաղաքապետարանի բոլոր աշխատակիցներին անգլերեն սովորել: Ընդ որում, նա խոստացել է, որ 2011 թվականից անգլերենի անվճար դասընթացներ է կազմակերպելու, որոնց մասնակցելու են քաղաքապետարանի բոլոր աշխատակիցները: Նոր քաղաքապետը նաեւ սպառնացել է, որ դասընթացներից հետո քննություն է կազմակերպելու, եւ անգլերեն չիմացողներին հեռացնելու է աշխատանքից:
Աղբյուրը նշեց նաեւ, որ անվճար անգլերեն սովորելու (այն էլ աշխատանքային ժամերին հաշվին) հեռանկարը բավական ոգեւորել է երիտասարդ աշխատակիցներին, իսկ առավել տարիքով աշխատակիցները ցավով նկատում են, որ Կարապետյանն այդկերպ մտադիր է ազատվել հին կադրերից, որոնց համար տարիքի պատճառով բարդ կլինի սերտել անգլերենի կանոնները:
