Արցախի նախագահ Բակո Սահակյանը հունվարի 3-ին այցելել է Շուշիի եւ Քաշաթաղի շրջաններ:
Շուշի քաղաքի շրջակայքում նա մասնակցել է նորակառույց տրանսֆորմատորային ենթակայանի բացման միջոցառմանը:
Այնուհետեւ երկրի ղեկավարը Քաշաթաղի շրջանի Աղավնո-Մելիքաշեն հատվածում մասնակցել է «Սյունիք-1» հիդրոէլեկտրակայանի բացման արարողությանը, ինչպես նաեւ տեղում ծանոթացել «Սյունիք-2» հիդրոէլէկտրակայանի կառուցման աշխատանքներին:
Նախագահը կարեւոր է համարել վերոհիշյալ օբյեկտների նշանակությունը Արցախի էներգետիկայի զարգացման համար՝ ընդգծելով, որ աշխատանքներն այս ուղղությամբ կկրեն շարունակական բնույթ:
Նույն օրը Բակո Սահակյանը Բերձոր շրջկենտրոնում մասնակցել է նորակառույց բազմաբնակարան շենքի բնակարանամուտի հանդիսավոր արարողությանը:
Նախագահը կարեւորել է Բերձոր քաղաքի շենացման աշխատանքները՝ տնտեսական, սոցիալական եւ քաղաքական առումներով:
Այցի վերջում նախագահը Քաշաթաղի շրջանի Մելիքաշեն գյուղում խորհրդակցություն է հրավիրել Սոնասարի եւ Աղավնոյի ձորակների համայնքների ղեկավարների հետ, որտեղ քննարկվել են համայնքների առջեւ ծառացած հիմնախնդիրներին եւ դրանց լուծման ուղիներին վերաբերող հարցեր:
Միջոցառումներին ներկա են եղել Արցախի վարչապետ Արա Հարությունյանը, կառավարության անդամներ, Արցախի եւ Հայաստանի խորհրդարանների պատգամավորներ, Սյունիքի մարզպետ Սուրեն Խաչատրյանը, պաշտոնատար այլ անձինք:
