Ղարաբաղյան հակամարտության կարգավորման հետագա բանակցությունները որեւէ արդյունք չեն տա, եթե դրանցում ներկայացված չլինի Լեռնային Ղարաբաղը: NEWS.am-ի թղթակցի հետ զրույցում նման կարծիք է հայտնել Քաղաքական եւ ռազմական վերլուծության ինստիտուտի ռազմական կանխատեսման կենտրոնի ղեկավար, փորձագետ Անատոլի Ցիգանոկը: Նրա կարծիքով, ղարաբաղյան հակամարտությունը առաջիկայում զգալի «շարժ» չի արձանագրի:
«Դրա համար կան մի շարք գործոններ, ինչպես ներքին, այնպես էլ արտաքին: ԱՄՆ-ում, որը բանակցային գործընթացի ակտիվ մասնակից է, փոխվում է իշխանությունը Կոնգրեսում, 2012թ. Ադրբեջանում լուրջ ընտրություններ են լինելու, նաեւ սուր է լինելու փախստականների հարցը. Ո՞ւր են նրանք գնալու: Ապա կանգնելու է Գաբալայի ՌԼԿ խնդիրն ու այդ հարցին Ռուսաստանի մասնակցությունը»,- թվարկել է Ցիգանոկն ու ամփոփել, որ, ընդհանուր առմամբ, միջնորդ երկրների կարծիքները ղարաբաղյան հարցի կարգավորման մեթոդների վերաբերյալ տարբերվում են իրարից: Ըստ փորձագետի՝ այդ հանգամանքներից ելնելով կարելի է ասել, որ 2011թ. Հարավային Կովկասում փայլուն զարգացում ակնկալել պետք չէ:
