«Ահավոր» բառը, որը Թուրքիայի վարչապետ Էրդողանն օգտագործել էր հայ-թուրքական բարեկամության կոթողը նկարագրելիս, նրա ճաշակի դրսեւորումն է` NEWS.am-ի հետ զրույցում հայտարարեց ԱՊՀ երկրների ինստիտուտի մասնաճյուղի ղեկավար Ալեքսանդր Մարկարովը:
«Հնարավոր է, որ նրա ճաշակը թույլ չի տալիս այդպիսի կոթողի գոյությունը Կարսում: Իհարկե, կարելի էր այն կատարելագործել, ոչ թե` քանդել: Էրդողանը կարող էր այդպիսով քաղաքական հանդուրժողականություն դրսեւորել», - նշեց Մարկարովը:
Փորձագետի կարծիքով, կարող է իրականություն լինել նաեւ այն տեսակետը, թե Էրդողանը ցանկանում է այդպիսի հայտարարություններով շահել Կարսում ապրող ադրբեջանցիների ձայները:
«Սակայն չեմ կարծում, թե արձանը քանդելով կարելի է ստանալ Կարսի բնակիչների 20 տոկոսը կազմով ադրբեջանցիների ձայները: Քաղաքական առաջնորդները ձայն են ստանում ոչ թե մեկանգամյա գործողություններով, այլ` երկարաժամկետ ծրագրերով, որոնք ուղղված են տվյալ տարածքի սոցիալ-տնտեսական զարգացմանը»:
Քաղաքագետը նաեւ նշեց, որ մինչեւ 2011թ. հուլիսին կայանալիք Թուրքիայի խորհրդարանական ընտրությունները հայ-թուրքական հարաբերությունների կարգավորման գործընթացում լուրջ քայլեր չեն լինի, թեւ հարցն օրակարգում է: