Երեւանի քաղաքապետարանն ի գիտություն է ընդունել «Ժողովրդական կուսակցության» քաղխորհրդի նախագահի` հունվարի 12-ի իրազեկումը` հունվարի 19-ին ժամը 15.00-18.00-ին Մատենադարանի հարակից տարածքում հանրահավաք անցկացնելու վերաբերյալ:
Սա Տիգրան Կարապետյանի ղեկավարած «Ժողովրդական կուսակցության» արդեն 2-րդ հանրահավաքն է, որն ուղղված է ԱԼՄ հեռուստաալիքը փակելու դեմ:
Հիշեցնենք, որ 2010թ. դեկտեմբերի 16-ին Հեռուստատեսության եւ ռադիոյի ազգային հանձնաժողովը (ՀՌԱՀ) որոշում էր կայացրել ԱԼՄ հեռուստաալիքը փակելու մասին, հաղթող էր ճանաչվել «Երեւան» հեռուստաալիքը:
Հունվարի 7-ին կայացած առաջին հանրահավաքում Տիգրան Կարապետյանը հայտարարել էր, որ իրենք պայքարում են ոչ միայն ԱԼՄ հեռուստաընկերության համար, այլ «Ա1+», «Գալա» հեռուստաընկերությունների եւ «Մարտի 1-ի» համար: Հանրահավաքի կարգախոսն էր «Ոչ անարդարությանը»: Կարապետիչը մտադիր է նաեւ Երեւանցիների հայրենակցական միություն ստեղծել, դրանով, թերեւս, ակնարկելով, որ «Երեւան» հեռուստաընկերության թիկունքում կանգնած է գլխավոր դատախազը, ով ապարանցիների հայրենակցական միության պատվավոր նախագահն է: