Հարավային Սուդանի անկախության հանրաքվեն կարող է դրական ազդել ինքնորոշման իրավունքի հետ խնդիրներ ունեցող այլ երկրների պրակտիկայի վրա, մասնավորապես, ղարաբաղյան խնդրի լուծման եւ ԼՂՀ միջազգային ճանաչման վրա: Այդ մասին NEWS.am-ի թղթակցի հետ զրույցում հայտարարել է Հայաստանի Հանրապետական կուսակցության մամուլի քարտուղար, ՀՀԿ խորհրդարանական խմբակցության քարտուղար Էդուարդ Շարմազանովը` նշելով, որ պատահական չէ նաեւ ԱՄՆ նախագահ Բարաք Օբամայի հայտարարությունը, թե Սուդանի հանրաքվեն նախադեպ կդառնա ամբողջ աշխարհի համար:
Շարմազանովի խոսքով, նախադեպ կարող է ծառայել նաեւ Կոսովոյի վերաբերյալ Միջազգային դատարանի որոշումը: «Գործնականում, իքնորոշման իրավունքն աստիճանաբար դառնում է ավելի կիրառվող եւ առաջնահերթային, քան տարածքային ամբողջականությունը: Ուզեն, թե չուզեն մեր արեւելյան հարեւանները, սակայն փաստ է, որ աշխարհը գնում է այդ ուղիով: Ես կարծում եմ, որ այս հանրաքվեն մեկ անգամ եւս ապացուցում է, որ եթե ժողովուրդն ուզում է իրացնել ինքնորոշման իր իրավունքը, ապա դրան այլընտրանք չկա»:
Շարմազանովի կարծիքով, թեեւ գործընթացը կարող է ձգձգվել, սակայն, այդուամենայնիվ, նախորդ երկու ամիսներին տեղի ունեցան երկու կարեւոր իրադարձություններ` Կոսովոյի կարգավիճակի վերաբերյալ Միջազգային դատարանի որոշումը, եւ անկախության հանրաքվեն Սուդանում:
«Մենք պետք է գիտակցենք, որ ԼՂՀ-ն հռչակել է իր անկախությունը եւ անկախության հանրաքվե է անցկացրել միջազգային իրավունքի եւ բոլոր միջազգային նորմերի հիման վրա: Սակայն ես չեմ պնդում, թե այն ինչ տեղի ունեցավ Սուդանում պետք է նույնությամբ կրկնվի Ղարաբաղում եւ տարածաշրջանում», - նշեց Շարմազանովը` ավելացնելով, թե Սուդանում հանրաքվե անցկացնելու մեջ գլխավորն այն է, որ աշխարհը գործնականում նախապատվությունը տալիս է ինքնորոշման իրավունքին:
«Մենք պետք է չգնանք երկակի ստանդարտների ճանապարհով` հասկանալով, որ ամեն նախադեպ իր դժվարություններն ունի, սակայն Սուդանի նախադեպը մեկ անգամ եւս ապացուցում է, որ աշխարհը գործնականում հնարավորություն է տալիս օգտագործել ժողովրդի ինքնորոշման իրավունքը», - կարծիք հայտնեց ՀՀԿ մամուլի քարտուղարը:
Հիշեցնենք, որ հունվարի 9-ից 15-ը Սուդանում կայացավ երկրի հարավի ինքնորոշման հանրաքվեն: Հարավային Սուդանում ընտրողների մասնակցությունը կազմեց 80 տոկոս, Հյուսիսում` 50 տոկոս: Հիշեցնենք նաեւ, որ 2010թ. ամռանը Հաագայի Միջազգային դատարանը Կոսովոյի կարգավիճակի մասին եզրակացությամբ` հայտարարեց, որ Սերբիայի այդ հարավային երկրամասի անկախության միակողմանի հռչակումը չի հակասում միջազգային իրավունքի նորմերին:
