Հայաստանի ոստիկանության քննչական գլխավոր վարչության Վայոց ձորի մարզային քննչական բաժնի Եղեգնաձորի քննչական բաժանմունքում հարուցվել է քրեական գործ կեղծ թղթադրամներ պահելը, ձեռք բերելը եւ իրացնելը հոդվածով:
Ինչպես NEWS.am-ին հաղորդում է ֆոտոլրագրող Գագիկ Շամշյանը, հունվարի 16-ին, Արենի գյուղի բնակիչ 36-ամյա Հայկանդուխտ Արտաշեսի Խաչատրյանը, ով աշխատում է «Արփա-1» ՍՊԸ-ում որպես վաճառողուհի, ոստիկանության Եղեգնաձորի բաժանմունքում հայտնել է, որ գիշերը «Ինֆինիթի» մակնիշի սպիտակ գույնի ավտոմքենայի վարորդն ու 2 ուղեւորներ իր մոտից գնումներ են կատարել եւ իրեն վճարել 10,000 դրամանոց կեղծ թղթադրամ:
Ոստիկանության Վայոց ձորի մարզային վարչության եւ Եղեգնաձորի բաժնի աշխատակիցները նույն օրը նշված ավտոմեքենան հայտնաբերել են Արփի գյուղից դուրս գալիս: Պարզվել է, որ այդ մեքենայի վարորդը Գեղարքունիքի մարզի Լանջաղբյուր գյուղի բնակիչ 29-ամյա Վարդան Ռադիկի Բաղդասարյանն է, իսկ ուղեւորները՝ Երեւանի Ռուբինյան 2/3 շենքի 57 բնակարանի բնակիչ 28-ամյա Էդգար Ռուբենի Մելքոնյանն ու Երեւանի Լենինգրադյան-16, 31 բնակարանի բնակիչ 45-ամյա Վարուժան Արամայիսի Ասլանյանը:
Վերջինս աշխատում է ՌԴ Կալինինգրադի մարզի «Վեստ Ալկո» օղու գործարանում որպես մենեջեր: Բոլոր երեքն էլ այս պահին ձերբակալվել են եւ գտնվում են ոստիկանության Վայոց ձորի մարզային վարչության ժամանակավոր պահման մեկուսարանում: Իսկ «Ինֆինիթի» մեքենայի վրա եղել է ժամանակավոր համարանիշ՝ 3640-10:
