Ամերիկայի հայկական ազգային կոմիտեն ողջունում է Հայաստանում Ամերիկյան առեւտրային պալատի (AmCham) կոչը՝ առեւտրա-ներդրումային համաձայնագիր (TIFA) կնքել ԱՄՆ-ի եւ Հայաստանի միջեւ, եւ այն համարում է որպես զգալի քայլ այդքան կարեւոր երկկողմ համաձայնագրի կնքման ճանապարհին՝ միտված նոր, արտահանմամբ խթանվող աշխատատեղերի եւ տնտեսական աճին: Այդ մասին հայտնել է Ամերիկայի հայկական ազգային կոմիտեն (ANCA): Նշենք, որ Հայաստանում ամերիկյան առեւտրային պալատը ԱՄՆ առեւտրային պալատի բաժանմունքն է:
Հունվարի 18-ին տարածված հայտարարության մեջ Հայաստանում Ամերիկյան առեւտրային պալատի խորհրդի նախագահ Դավիթ Աթանեսյանը նկատել է. «Մենք խորապես համոզված ենք, որ շրջանակային համաձայնագրի կնքումը համապատասխանում է կապերի խորացման եւ երկու բարեկամական ազգերի միջեւ երկխոսության ընդլայնման ոգուն»: