Մարտի 1-ի դեպքերն ու դրան հաջորդած գործընթացները պարզորոշ ցուցադրեցին այն բոլոր խութերը, որ կան դատական, ոստիկանական համակարգում: Այս մասին հայտարարել է Արդարադատության նախարար Հրայր Թովմասյանը, ով այսօր՝ հունվարի 19-ին ընդունել է Եվրոպայի խորհրդի մարդու իրավունքների հանձնակատար Թոմաս Համարբերգին:
«Հենց նախարարի խնդիրն է գտնել եւ վերացնել դրանք ծնող օրենսդրական պատճառները»,- ասել է նախարարը:
Ինչպես NEWS.am-ին հայտնեց Արդարդատության նախարարի մամուլի քարտուղար Կարինե Քալանթարյանը, նրանք անդրադարձել են 2008 թվականի մարտի 1-ին Երեւանում տեղի ունեցած իրադարձություններից հետո դատապարտված եւ առ այսօր անազատության մեջ գտնվող 9 անձանց ազատ արձակելու, 10 զոհերի մահվան հանգամանքները բացահայտելու եւ մեղավորներին պատասխանատվության ենթարկելու հարցերին:
Բացի այդ, հանդիպման ընթացքում քննարկվել են թե՜ համակարգում առկա խնդիրները, թե այն ուղղություններն ու քայլերը, որոնք ձեռնարկելու դեպքում հնարավոր կլինի լուծել այդ խնդիրները:
Անդրադառնալով Հայաստանի քրեակատարողական հիմնարկներում առկա պայմաններին ՀՀ արդարադատության նախարարը տեղեկացրել է, որ համակարգում արմատական բարեփոխումներ իրականացնելու անհրաժեշտություն կա:
ԵԽ մարդու իրավունքների հանձնակատարն ընդունելով քրեակատարողական հիմնարկների վերաբերյալ արդարադատության նախարարի մտահոգություններն ու մոտեցումները, նկատել է, որ իր կարծիքով էլ «Բանտը չպետք է դառնա հանցավորության դպրոց, հաճախ ճիշտ եւ ավելի արդյունավետ է ազատազրկման փոխարեն պատժի այլ ձեւեր կիրառելը, ինչն ընդունված է Եվրոպայում»: «Եվրոպայի փորձը վկայում է, որ երբ ազատազրկմանը փոխարինող պատժատեսակներ են կիրառվում, կրկնահանցագործության ցուցանիշը նվազում է: »-իր խոսքում նշել է Թոմաս Համարբերգը:
Արդարադատության նախարար Հրայր Թովմասյանը մարդու իրավունքների հանձնակատարին տեղեկացրել է այս տարվա ընթացքում նախատեսվող օրենսդրական մի շարք փոփոխությունների / քրեական դատավարության եւ ընտրական օրենսգրքեր, հավաքների ազատության մասին օրենք / մասին: Անդրադառնալով դատական համակրգում առկա խնդիրներին, մարդու իրավունքների հանձնակատարը կարեւորել է հատկապես ԵԱՀԿ ԺՀՄԻԳ-ի զեկույցում ներառված դիտարկումները դատավարությունների ընթացքի եւ տեղ գտած թերությունների վերաբերյալ: Արդարադատության նախարարը փոխանցել է, որ քրեական դատավարության մասին նոր օրենքը եւ մյուս օրենսդրական ակտերը մշակվում են հաշվի առնելով հենց այդ դիտարկումներն ու նկատառումները: