«ՆԱՍԴԱՔՕԷՄԷՔՍ Արմենիա» բորսայում այսօր՝ հունվարի 20-ին դոլարը դրամի նկատմամբ արժեզրկվել է՝ մի քանի օր տեւող արժեւորումից հետո։ Փոխարժեքային տատանումը կրկին եղել է շատ կտրուկ։
Ընդհանուր առմամբ՝ իրականացվել է 2,7 մլն դոլար առուվաճառք՝ 1 դոլար/367,86 դրամ միջին փոխարժեքով։ Փակման գինը կազմել է 367։
Նախորդ օրվա համեմատ դոլարն էժանացել է 1,5 դրամով կամ 0,4 տոկոսով։
Փոխարժեքային կտրուկ տատանումները ֆոնդային բորսայում դարձել են սովորական։ Իր անունը հրապարակել չցանկացող ֆինանսիստներից մեկը NEWS.am-ին ասաց, որ արժութային բրոքերները միտումնավոր են ստեղծում փոխարժեքային տատանում՝ սպեկուլյատիվ եկամուտ ստանալու նպատակով։ Բանն այն է, որ բորսայի առեւտրային շրջանը փակվելու վերջում կամ հետո որոշ ժամանակ է պետք, մինչ շուկայի բոլոր հատվածներում փոխարժեքները հավասարակշռվեն։ Դա կարող է տեւել 5 կամ 10 րոպե, սակայն այդ ժամանակը բավարար է, որ իրականացվեն սպեկուլյատիվ գործարքներ։