Տիգրան Պետրոսյանի անվան շախմատի տանն այսօր՝ փետրվարի 1-ին տեղի է ունեցել Հայաստանի շախմատային ֆեդերացիայի հաշվետու-ընտրական համաժողովը, որի ժամանակ ֆեդերացիայի նախագահի պաշտոնում վերընտրվել է Հայաստանի նախագահ Սերժ Սարգսյանը:
Նախագահի մամուլի գրասենյակից NEWS.am-ին հայտնում են, որ Համաժողովը վարել է Սերժ Սարգսյանը:
Համաժողովի օրակարգի շրջանակներում ներկայացվել են Ֆեդերացիայի 2009-2010թթ. աշխատանքների եւ վերստուգիչ հանձնաժողովի հաշվետվությունները, նախանշվել են Ֆեդերացիայի 2011-2012թթ. աշխատանքների հիմնական ուղղությունները: Այնուհետեւ տեղի են ունեցել Ֆեդերացիայի նախագահի, նախագահության կազմի ընտրություններ:
Հաշվետու ժամանակաշրջանում Ֆեդերացիայի կատարած աշխատանքը գնահատվել է բավարար:
Ընտրվել է նաեւ 64 անդամից կազմված Ֆեդերացիայի նախագահության կազմ:
Այնուհետեւ տեղի է ունեցել Հայաստանի առաջնության բարձրագույն խմբի մրցաշարի մրցանակակիրների պարգեւատրման արարողությունը:
Նախագահ Սերժ Սարգսյանը պարգեւներ է հանձնել Հայաստանի 2011թ. չեմպիոն Ռոբերտ Հովհաննիսյանին, երկրորդ եւ երրորդ տեղերի մրցանակակիրներ Սամվել Տեր-Սահակյանին եւ Զավեն Անդրիասյանին: Ընդգծվել է, որ առաջին անգամ մեր երկրի առաջնությունների անցկացման պատմության ընթացքում այդ մրցաշարն ամբողջովին հավաքել է գրոսմայստերական կազմ:
Համաժողովից հետո տեղի է ունեցել ֆեդերացիայի նորընտիր նախագահության առաջին նիստը: Նախագահությունը հաստատել է նախագահի տեղակալների, գործադիր տնօրենի, գլխավոր քարտուղարի թեկնածուներին, ովքեր Ֆեդերացիայի կանոնադրության համաձայն, մտնում են Ֆեդերացիայի խորհրդի կազմի մեջ: Ֆեդերացիայի նախագահի առաջին տեղակալ է դարձել Սմբատ Լպուտյանը, տեղակալներ` Յուրի Առուստամյանը, Գագիկ Գեւորգյանը, Հովիկ Խալիկյանը, Լեւոն Յոլյանը, Տիգրան Սարգսյանը, Աշոտ Վարդապետյանը, գործադիր տնօրեն` Հրաչիկ Թավադյանը, գլխավոր քարտուղար` Գագիկ Հովհաննիսյանը:
Նիստում հաստատվել են նաեւ Ֆեդերացիայի հանձնաժողովների կազմը եւ հանձնաժողովների նախագահները:
