Հայաստանի մարդու իրավունքների պաշտպան Արմեն Հարությունյանը սահմանված կարգի համաձայն հրաժարականի դիմում է ներկայացրել Հայաստանի ազգային Ժողովին: Այդ մասին մամուլի ասուլիսում հայտարարել է ինքը՝ Արմեն Հարությունյանը՝ նշելով, որ դիմումը ներկայացրել է երեկ՝ փետրվարի 1-ին:
Ինչպես արդեն հայտնել է NEWS.am-ը, Արմեն Հարությունյանը նշանակվել է Կենտրոնական Ասիայում ՄԱԿ-ի Մարդու իրավունքների հանձնակատարի ներկայացուցիչ: Մեր թղթակցի հետ զրույցում նա հայտնել էր, որ «նման պաշտոնից հրաժարվելը կլիներ...պաթոլոգիա, քանի որ այդպիսի պաշտոնի հնարավորություն հարյուր տարին մեկ է լինում»:
Նշենք, որ Հարությունյանը Հայաստանի Մարդու իրավունքների պաշտպանի պաշտոնն զբաղեցնում է 2006 թվականի փետրվարի 20-ից։ Ներկայումս շրջանառվում են Հայաստանի մարդու իրավունքների պաշտպանի մի քանի թեկնածուների անուններ:
Հարցին, թե ո՞ւմ է տեսնում Հայաստանի օմբուդսմենի պաշտոնում, Արմեն Հարությունյանը պատասխանել է. «Այդ հարցով ես չեմ խոսել եւ քննարկում չի ծավալվել: Հայաստանի մարդու իրավունքների պաշտպանի նշանակումը սահմանված է օրենքով: Այդ ինստիտուտը կայացած եւ կարծում եմ, որ հաջորդ Պաշտպանը կկարողանա նորմալ գործունեություն իրականացնել»:
