Վերստուգող հանձնաժողովները ստուգումների արդյունքում բազմաթիվ չարաշահումներ են հայտնաբերել 50 տոկոս եւ ավելի պետական մասնակցությամբ ձեռնարկություններում։ Թվով 332 կազմակերպություններում իրականացված ստուգումների արդյունքում հայտնաբերվել է մոտ 1,3 մլրդ դրամի (մոտ 3,5 մլն դոլար) ֆինանսական խախտում, որից 403 մլն դրամը (մոտ 1,1 մլն դոլար)՝ 2010 թ.:
Ըստ վարչապետ Տիգրան Սարգսյանի՝ կառավարությունը պարզապես կարգուկանոն է մտցնում այդ ոլորտում։ Այսօր՝ փետրվարի 3-ին կայացած նիստում վարչապետը հայտարարեց, որ այդ դաշտը պետք է մաքրել։ Նրա խոսքով՝ կան մոտ 1400 ձեռնարկություններ, որոնց մի մասն արդեն լիկվիդացման եւ սնանկացման գործընթացում է։ «Այն ձեռնարկությունները, որ մեզ անհրաժեշտ չեն, պետք է սեփականշնորհվեն կամ լիկվիդացվեն»,- հայտարարեց Տ. Սարգսյանը։