Այն մեղքերը, որը Սահակաշվիլին հասցրել է գործել իր նախագահ լինելու ընթացքում, կհերիքեն 30 նախագահների ձերբակալելու համար: Վրացական «Ասավալի-դասավալի» թերթին տված հարցազրույցում նշել է Վրաստանի լեյբորիստական կուսակցության նախագահ Շալվա Նաթելաշվիլին:
«Հիշում եմ, թե ինչպես էին փախստականները հավատում Սահակաշվիլուն, որ նրա օգնությամբ կվերադառնան Սոխումի, իսկ հիմա անիծում են նրան: Թող այսօր ոչ մի փախստական չբողոքի եւ ինքն իրեն մեղադրի»,- ասել է նա ու հավելել. «Սահակաշվիլին «թոզ փչեց» բնակչության աչքերին, քայքայեց, քանդեց Վրաստանը: Եթե ժողովուրդը դուրս գա փողոց բողոքի, ապա նա միմիայն պետք է պահանջի Սահակաշվիլու հրաժարականը»:
Շալվա Նաթելաշվիլին հավաստիացրել է, որ Վրաստանի նախագահն իր մութ գործունեությունը շարունակելու համար սպանել է տվել ոչ միայն Վրաստանի նախկին վարչապետ Զուրաբ Ժվանիային, այլեւ վրաց գործարար Բադրի Պատարկացիշվիլիին:
Այնուհետեւ անդրադառնալով փախստականների խնդրին, ընդդիմության ներկայացուցիչը նշել է, որ Սահակաշվիլիին ձեռնտու է փախստականներին զրկել փախստականի կարգավիճակից, որպեսզի Վրաստանը վերջնականապես կորցնի Աբխազիան եւ Ցխինվալին:
«Եթե չունենք փախստական, ապա չենք կարող պահանջել, որ հետ վերադարձնեն մեր կորցրած տարածաշրջանները: Հատկապես, որ փախստականներն արդեն ունեն իրենց մշտական ապրելավայրը, ապա նա իրավաբանորեն արդեն փախստական չի կարող համարվել»,- ասել է Նաթելաշվիլին ու ընդգծել. «Վրաստանը թույլ չի տա, որ 2013 թվականին Սահակաշվիլին վարչապետ նշանակվի: Վրաստանն ուզում է, որ ինքն ընտրի իր նախագահին, իսկ Սահակաշվիլին պետք է խեղդվի իր գործած մեղքերի մեջ»:
