Երեւան-Սեւան ավտոճանապարհի 38-րդ կմ հատվածում, փետրվարի 5-ին ժամը 17:20-ի սահմաններում տեղի է ունեցել ավտովթար:
Ինչպես NEWS.am-ին հայտնեց ֆոտոլրագրող Գագիկ Շամշյանը միմյանց են բախվել «ՊԱԶ» մակնիշի 63 ՍՍ 217 համարանիշի եւ Dodge մակնիշի 18 ԼԼ 022 համարանիշի ավտոմեքենաները: Վթարի հետեւանքով «ՊԱԶ»-ը շուռ է եկել ձորը, որի վարորդը՝ Գեղարքունիքի մարզի Երանոս գյուղի բնակիչ Օհան Փաշոյանը եւ մյուս 2 ուղեւորները մարմնական վնասվածքներով տեղափոխվել են Հրազդանի քաղաքային հիվանդանոց, իսկ Dodge-ի վարորդը՝ Երեւանի բնակիչ 47-ամյա Սարգիս Միքայելյանը որովայնի խոռոչի ներքին օրգանների կրծքավանդակի սալջարդով տեղափոխվել է Չարենացավանի քաղաքային հիվանդանոց: Ի դեպ, նա «Հ2» հեռուստաընկերության «Պահմտոցի+» հումորային ծրագրի հեղինակն է:
Դեպքի վայր են ժամանել Կոտայքի մարզի Փրկարար ծառայության աշխատակիցները ծառայության պետ Գեղամ Գրիգորյանի ղեկավարությամբ, Կոտայքի մարզային փրկարար ջոկատը, Հրազդանի հրշեջ-փրկարարները: Դեպքի վայրում են նաեւ Ճանապարհային ոստիկանության Կոտայքի մարզի աշխատակիցները:
Այս պահին վթարի վայրում քննչական աշխատանքներ են կատարում ոստիկանության քննչական գլխավոր վարչության Կոտայքի մարզի քննչական բաժնի քննիչները: Քննիչի որոշմամբ, Dodge-ը քարշակի միջոցով տեղափոխվել է ոստիկանության Կոտայքի մարզային վարչության տուգանային հրապարակ, իսկ «ՊԱԶ»-ը ձորից դուրս բերելու եւ տուգանային հրապարակ տեղափոխելու համար վթարի վայր են բերել վերամբարձ կռունկ: Կոտայքի մարզի քննչական բաժնում նյութեր են նախապատրաստվում:
Լուսանկարները եւ տեսանյութը՝ Գագիկ Շամշյանի