Հայաստանի ազգային մրցունակության հիմնադրամի ղեկավար Բեկոր Փափազյանն արձագանքել է մամուլում տեղ գտած այն տեղեկությանը, թե իր աշխատավարձը 6,2 մլն դրամ է (հրապարակումը վերնագրված է «6,2 մլն աշխատավարձը մի քիչ շատ չէ՞»):
Բեկոր Փափազյանի պատասխանում նշվում է.
«Հայաստանի ազգային մրցունակության հիմնադրամի գործադիր տնօրեն Բեկոր Փափազյանի աշխատավարձը հրապարակման մեջ ներկայացված է առանց հարկային պահումների: Աշխատավարձի մասին տեղեկությունները խիստ անձնական են, եւ դրանց հրապարակումը կարելի է դիտարկել որպես «անձնական կյանքին միջամտութուն»: Այս պաշտոնի համար աշխատավարձը քննարկվում եւ հաստատվում է Մրցունակության հիմնադրամի հոգաբարձուների խորհրդում: Ավելին, հաշվի առնելով այն հանգամանք, որ Հիմնադրամի իրականացրած ծրագրերը մի քանի տասնյակ միլիոն դոլարի են հասնում` գործադիր տնօրենի աշխատավարձը պետք է համահունչ լինի դրանց: Մրցունակության հիմնադրամում աշխատավարձերը սահմանվում են` ելնելով Հայաստանում գործող միջազգային կազմակերպություններում առաջարկվող աշխատավարձերից: «Մեզ համար սկզբունքային է, որ համապատասխան որակավորում եւ կրթություն ստացած մասնագետներ հավաքագրենք` մեր ծրագրերն իրականացնելու համար: Դա նշանակում է, որ պետք է առաջարկենք շուկայում մրցունակ` այն է` միջազգային կազմակերպություններում առաջարկվող աշխատավարձ»,- նշել է Հայաստանի ազգային մրցունակության հիմնադրամի գործադիր տնօրեն Բեկոր Փափազյանը:
