Գյումրիի Թատերական հրապարակում այս պահին բողոքի ինքնաբուխ հանրահավաք է ընթանում, որին մասնակցում են Գյումրի-Բավրա բողոքի ավտոերթի մասնակիցները: Այդ մասին NEWS.am-ին հայտնեց Գյումրիի «Ասպարեզ» ակումբի նախագահ Լեւոն Բարսեղյանը: Վերջինիս խոսքով, հրապարակում մի քանի հարյուր մարդ է հավաքվել, սակայն մարդկանց հոսքը շարունակվում է: Հանրահավաքին ելույթ են ունեցել «Ժառանգություն» խմբակցության պատգամավորներ Արմեն Մարտիրոսյանը, Ստեփան Սաֆարյանը, Զարուհի Փոստանջյանը:
Հանրահավաքի մասնակիցները խորհրդանշական հանգանակություն են կազմակերպել եւ 100-ական դրամ հավաքել` Հայաստանի կառավարությանը փոխանցելու եւ բյուջեն լցնելու համար:
Նշենք, որ վրացական համարանիշներով մեքենաների վարորդներն այսօր ավելի վաղ փակել էին հայ-վրացական սահմանի Բավրա անցակետի տարածքն ու M1 մայրուղին: Լեւոն Բարսեղյանը նշեց, որ հանրահավաքից հետո վարորդները հավաքվելու են «Ասպարեզ» ակումբում հետագա անելիքները ճշտելու համար:
Ինչպես արդեն նշել է NEWS.am-ը, Բավրայի անցակետում բողոքի գործողությանը մասնակցել են Հայ ազգային կոնգրեսի, «Ժառանգություն» կուսակցության ներկայացուցիչները, Տիգրան Կարապետյանը:
Վրացական պետհամարանիշներով մեքենաների վարորդները բողոքում են օրենսդրական նոր փոփոխությունների դեմ, որոնց համաձայն վրացական պետհամարանիշերով ավտոմեքենաները Հայաստանում քաղաքացին կարող է վարել միանվագ մուտքով առավելագույնը 15-օրյա ժամկետով: Ըստ վարորդների իրենց ստիպում են մաքսազերծել մեքենաները խայտառակ բարձր մաքսատուրքերով, իսկ իրենք ի վիճակի չեն վճարել այդ գումարները:
