Երեւանում հանգստյան օրերը նշանավորվեցին հացի եւ ալյուրի թանկացման նոր ալիքով։ Թեեւ տարբեր խանութներում թանկացումներն անհամաչափ են ընթանում՝ կարելի է խոսել հացի հերթական 5-10 դրամ թանկացման մասին։
Հացի եւ ալյուրի հերթական թանկացումների մասին NEWS.am-ը պարզաբանումներ խնդրեց հացահատիկի խոշոր ներկրող «Մանչո Գրուպ» ընկերության նախագահ Իվան Մուսոյանից; Նրա տեղեկացմամբ՝ այսօրվանից իրենց ընկերությունը իրականացրել է ալյուրի բացթողնման գների բարձրացում։ Մեկ պարկ ալյուրը (50 կգ) բաց է թողնվում 34 դոլարի համարժեք դրամով՝ նախկին 31 դոլարի համեմատ։ Այսինքն՝ 1 կգ ալյուրի մեծածախ գինը բարձրացել է մինչեւ 248 դրամ՝ ռեկորդային բարձր մակարդակ վերջին 2 տարում։
Մուսոյանի պարզաբանմամբ՝ միջազգային շուկայում ցորենի խնդիրը բավականին բարդացել է։ Ներկայում ցորենի մատակարարման առավել հարմար երկիրը Ուկրաինան է, սակայն այնտեղ կրկին երկարաձգել են արտահաման քվոտաները։ «Ցորեն բերելը բավական լրջացել է։ Մի կերպ ենք բերում Ուկրաինայից։ Այսօր պետք է թռչեի այնտեղ, բայց զանգեցին ասացին՝ մի 2 օր էլ սպասի։ Միակ հարմար տեղը Ուկրաինան է, ԱՄՆ-ում կամ Եվրոպայում ցորենը 60 դոլարով թանկ է»,- ասաց Մուսոյանը։
Նա նաեւ տեղեկացրեց, որ ներկրվող ցորենի մաքսազերծման հսկիչ գինը բարձրացվել է մինչեւ 350 դոլար՝ նախկին 250 դոլարի համեմատ։ Նրա խոսքով՝ ավելի ճիշտ կլիներ ներկրվող ցորենն ընդհանրապես ազատվեր հարկից, սակայն հավանաբար դրան խոչընդոտում են բյուջետային խնդիրները։ Ըստ Մուսոյանի՝ ներկրվող ցորենի ինքնարժեքը մինչ մաքսազերծումը հասնում է մոտ 420 դոլարի։
