Ղարաբաղյան հակամարտության գոտում պատերազմի սպառնալիքը մշտապես աճում է, որի միակ պատճառը Բաքվի դիրքորոշումն է: NEWS.am-ի թղթակցի հետ զրույցում նման կարծիք է հայտնել Ռազմավարական եւ ազգային հետազոտությունների հայկական կենտրոնի ղեկավար Ռիչարդ Կիրակոսյանը:
«Վերջապես Վաշինգտոնը հասկացավ եւ գիտակցեց, որ Լեռնային Ղարաբաղը պայթյունի պոտենցիալ օջախ է, ինչի մասին վկայում են ԱՄՆ բարձրաստիճան ներկայացուցիչների հայտարարությունները: Երեւանի արձագանքն այսպիսին էր. «Դե, փառքդ շատ, որ ի վերջո հասկացաք եւ գիտակցեցիք տարածաշրջանում իրական իրավիճակը»,- ասել է նա:
Փորձագետը նշել է նաեւ, որ ներկայումս Մինսկի խմբի հիմնական ջանքերն ուղղված են ռազմական գործողությունների հնարավոր վերսկսումը կանխելուն: «Հենց դրա վրա է սեւեռված լինելու Հայաստանի, Ռուսաստանի եւ Ադրբեջանի նախագահների` Սոչիում կայանալիք եռակողմ հանդիպումը: Այսինքն, հանդիպմանը հիմնական ուշադրությունը հատկացվելու է Ադրբեջանի դիրքորոշմանը»,- պարզաբանել է փորձագետը:
Կիրակոսյանը նկատել է, որ ամենահատկանշականն այս հանդիպմանը Ռուսաստանի միջնորդությունն է, ով ունի Մինսկի խմբի մյուս համանախագահների` ԱՄՆ-ի եւ Ֆրանսիայի աջակցությունը: «Այսինքն, կարելի է եզրակացնել, որ Ռուսաստանն ու ԱՄՆ-ը ղարաբաղյան հարցում սերտ համագործակցում են: Բայց եթե այդ համագործակցությունը շարունակվի, կարող է հակասել հայկական կողմի շահերին, քանի որ Ռուսաստանը կարող է ավելի չեզոք դառնալ, ինչը հղի է լուրջ վտանգներով»,- ամփոփել է փորձագետը: