Մրցունակության եւ կանոնակարգիչ բարեփոխումների թեման է քննարկվել Երեւանի քաղաքապետ Կարեն Կարապետյանի եւ ԵԱՀԿ երեւանյան գրասենյակի ղեկավար, դեսպան Սերգեյ Կապինոսի, «Ջեյքոբս ընդ ասոշիեյթս» խորհրդատվական ընկերության գործադիր տնօրեն Սքոթ Ջեյքոբսի հետ հանդիպման ընթացքում:
Երեւանի քաղաքապետարանի մամուլի ծառայությունից NEWS.am-ին հայտնում են, որ ԵԱՀԿ երեւանյան գրասենյակի ղեկավարն ընդգծել է «Ջեյքոբս ընդ Ասոշիեյթս» խորհրդատվական ընկերության բարձր վարկանիշն ու միջազգային հարուստ փորձը օրենսդրական կանոնակարգերի բարեփոխման ասպարեզում, ավելացնելով, որ ընկերության ծառայությունները կարող են օգտակար լինել մայրաքաղաքի կառավարման ոլորտում։
Խոսելով քաղաքային տնտեսության եւ գործարար հատվածի միջեւ համագործակցության արդյունավետ մոդելի ձեւավորման շուրջ, Կարեն Կարապետյանը նշել է, որ այսօր քաղաքապետարանի աշխատակազմի թիվ մեկ խնդիրը բիզնես միջավայրի համար բարենպաստ պայմանների ապահովումն է ու ներդրումների ներգրավումը: Այդ դաշտում ընթացակարգերը պարզեցնելու եւ կոռուպցիոն ռիսկերը նվազագույնի հասցնելու համար քաղաքապետը կարեւոր է համարել իրավական ակտերի ու կանոնակարգերի բարեփոխման անհրաժեշտությունը` ակնկալելով ընկերության խորհրդատվական աջակցությունը։
«Ջեյքոբս ընդ ասոշիեյթս» –ի գործադիր տնօրենը քաղաքապետին համառոտ ներկայացրել է ընկերության աշխատանքի փորձը գոյություն ունեցող կանոնակարգերի մաքրման, ներդրումների տեսանկյունից բարենպաստ նոր կանոնակարգերի ստեղծման գործընթացի հստակեցման ու որակի վերահսկման ուղղությամբ: Նրա խոսքով ընկերության կողմից մշակված Կանոնակարգման ազդեցության գնահատում (ԿԱԳ) եւ կանոնակարգիչ գիլյոտին ծրագրերը հանդիսանում են բարեփոխումների ժամանակակից գործիքներ։ Որպես կայուն բարելավման գործուն մեխանիզմներ , հաջողությամբ ներդրվել են մի շարք երկրներում եւ էական ազդեցություն են ունեցել բիզնես միջավայրի զարգացման վրա:
Կողմերը պայմանավորվածություն են ձեռք բերել համատեղ աշխատանքային խումբ ստեղծելու եւ առաջարկությունների առաջին փաթեթը ներկայացնելու վերաբերյալ:
