Թամրազյան ընտանիքը կարող է մնալ Նիդերլանդներում այն բանից հետո, երբ կոալիցիոն կառավարությունը համաձայնել է փախստականների 630 երեխաներին բնակության իրավունք տրամադրել:
Հաագայում եկեղեցին ի աջակցություն Թամրազյան ընտանիքի 96 օր շարունակ անդադար ժամերգություն էր անցկացրել: Թամրազյան ընտանիքում 21,19 եւ 15 տարեկան երեք երեխա կա: 450 կամավոր քահանաներ 13 շաբաթվա ընթացքում ժամերգություն են անցկացրել, գրում է Dutch News-ը:
Նշվում է, որ 630 երեխաների մի մասը ծնվել է Նիդերլանդներում եւ երբեք չի եղել իրենց ծնողների երկրներում:
Օրենքը սակայն չափազանց ուշ ուժի մեջ մտավ Գրիգորյան ընտանիքի համար, որին անցյալ շաբաթ արտաքսել էին Հայաստան: Ընտանիքը, ներառյալ երեք երեխաները՝ 3, 5 եւ 8 տարեկան, 9 տարի շարունակ ապրում էր Նիդերլանդներում եւ երեխաներն այնտեղ էին ծնվել, հաղորդում է Nl Times.-ը:
Ընտանիքի հոր՝ Հովիկի խոսքով, նրանց համար շատ դժվար է Հայաստանում, քանի որ երեխաները հայերեն չեն խոսում եւ կարոտում են իրենց տունը:
«Մենք ապրում ենք փոքր բնակարանում: Բոլորս քնում ենք ներքնակների վրա՝ հատակին:
Ցուրտ է եւ մենք ոչինչ չունենք»,- պատմել է նա՝ հավելելով, որ աղջիկը՝ Շուշանը, որին մի քանի տարի առաջ բեռնատարը վրաերթի էր ենթարկել, Հայաստանում պատշաճ խնամքի չի ստանում:
Ընտանիքի փաստաբան Մերի Գրիգորյանն ամեն ինչ անում է, որպեսզի ընտանիքը կարողանա հետ վերադառնալ: