Հայաստանի կառավարությունը մտահոգված է բնակչության արտագաղթի մակարդակով եւ քայլեր է ձեռնարկում այն կրճատելու ուղղությամբ: Այս մասին հայտարարել է Հայաստանի վարչապետ Տիգրան Սարգսյանը փետրվարի 25-ին երկրի հեռուստաընկերությունների ներկայացուցիչներին տված հարցազրույցում:
«Իհարկե, միգրացիոն ծառայույթունից ստացված թվերը մեզ մտահոգում են: Այդ պատճառով մենք հաստատել ենք հատուկ ծրագրեր` ուղղված արտագաղթի մակարդակի նվազմանը եւ բարենպաստ պայմանների ստեղծմանը այն հայրենակիցների համար, ովքեր ցանկություն կհայտնեն վերադառնալ հայրենիք»,-ասել է վարչապետը:
Պաշտոնական տվյալների համաձայն` Հայաստանից հեռացածների թիվը` սկսած 1992թ-ից մինչեւ 2010թ. հուլիս, կազմում է 1-1,1 մլն մարդ: Միգրացիայի պետական ծառայության տվյալներով` միգրանտների 65 տոկոսը որպես հիմնական բնակության վայր ընտրել է Ռուսաստանը, ապա հաջորդում են ԱՄՆ-ը եւ Ուկրաինան: Հայաստանից հեռանալ փորձող տղամարդականց թիվը գրեթե երկու անգամ ավելի է, քան կանանց թիվը: Մեկնողների հիմնական մասն աշխատունակ տարիքում է (30-50 տարեկան):
