Ծանրամարտի աշխարհի չեմպիոն Նազիկ Ավդալյանը մեկ ամիս առաջ է վերադարձել մարզումներից: Ինչպես հայտնի է, ոտքի լուրջ վնասվածքի պատճառով կես տարուց ավելի Նազիկը դադարեցրել էր պարապմունքները, բայց մեկ ամիսն էլ բավական էր, որ աշխարհի չեմպիոնն արդարացներ իրեն:
Օրերս նա մայրաքաղաքում կայացած մեծահասակների առաջնությանը լուրջ կիլոգրամներ է բարձրացրել ու ոսկե մեդալ նվաճել: «Առողջական վիճակս չի ներում, որ ապրիլին մասնակցեմ Եվրոպայի մրցումներին, այդ պատճառով պատրաստվում եմ մեծահասակների աշխարհի առաջնությանը»,- NEWS.am-ին ասել է Նազիկ Ավդալյանը:
Կին ծանրամարտիկներից Եվրոպայի առաջնությանը Գյումրին կներկայացնի Մելինե Դալուզյանը: Ծանրորդուհին լուրջ մարզումների է անցել: Նրա ներկա պատրաստվածությունը մարզիչը բավարար է գնահատում: Մելինեն հուսով է, որ առաջիկա առաջնությանը գոհացնող արդյունքներ կունենա, մանավանդ որ վնասվածք այս անգամ չունի:
Նույն ակնկալիքով Եվրոպայի առաջնությանը Կազան կմեկնի նաեւ ծանրամարտիկ Հայկ Հակոբյանը: 20-ամյա երիտասարդն այս ասպարեզում արդեն լուրջ ձեռքբերումներ ունի:
