Ադրբեջանի իշխանությունները գրեթե ամեն օր ռազմատենչ հայտարարություններ են անում եւ սադրիչ գործողություններ իրականացնում: Այդ մասին հայտարարել է Հայաստանի ԱԳ նախարար Էդվարդ Նալբանդյանը ավստրիական «Der Standard»-ին տված հարցազրույցում:
«Միայն մեկ տարվա ընթացքում նրանք կրկնապատկել են իրենց ռազմական բյուջեն եւ մերժում են միջազգային հանրության կողմից արված առաջարկները՝ համաձայնության գալու ուժի չկիրառման, հրադադարի ամրապնդման, շփման գծից դիպուկահարների դուրս բերման շուրջ: Ես չեմ կարծում, որ ինչ-որ մեկը կարող էր մեկնաբանել, որ ադրբեջանական իշխանությունների կողմից որդերգված այդ վարքագիծը վտանգ չի ներկայացնում»,- նշել է Նալբանդյանը:
Ավստրիական թերթի լրագրողի հարցին, արդյոք Հայաստանը պետք է լուրջ ընդունի այդ ռազմատենչ հայտարարությունները, թե դրանք արվում են ավելի շատ Ադրբեջանի ներքին սպառման համար, Հայաստանի ԱԳ նախարարը պատասխանել է. «Ուժի կիրառման սպառնալիքը միջազգային իրավունքի խախտում է եւ ռազմատենչ վարվելակերպին համարժեք արձագանք չտալը հնարավոր է հանգեցնի լուրջ հետեւանքների»:
Նալբանդյանը նշել է նաեւ, որ հարկավոր է ավելի զգուշավոր լինել տարածաշրջանային երկրներում տեղի ունեցող քաղաքական-սոցիալական զարգացումները համեմատելու հարցում: «Այն ժամանակ, երբ Հայաստանը քայլեր է ձեռնարկում ժողովրդավարությունը զարգացնելու համար, Ադրբեջանը քայլեր են ձեռնարկում՝ զարգացնելու ավտորիտարիզմը: Սա այն տեսակետն է, որն արտահայտել են միջազգային կազմակերպությունների մեծամասնությունը եւ որի հետ համակարծիք են փորձագետներից շատերը:
Հայաստանում լրատվամիջոցները եւ քաղաքացիական հասարակությունն ակտիվորեն ներգրավված են քաղաքական քննարկումներում, մի բան, որը չլսված բան է Ադրբեջանում»,- ասել է Հայաստանի ԱԳ նախարարն ու հավելել. «Ճիշտ հակառակը, պետության կողմից լիարժեք աջակցություն ստացող՝ հայերի նկատմամբ ատելություն սերմանող քարոզչությունը խանգարում է խաղաղության հաստատման գործընթացին: Եվ նման ճանապարհով երիտասարդ սերնդի ուղեղները թունավորումը խոչընդոտում է ապագա կարգավորման համար: Ընդհանուր առմամբ, փոխզիջման եւ խաղաղ երկխոսության ոգին առավել քիչ է հավանական ավտորիտար երկրներում»:
