Սոչիում տեղի ունենալիք երեք նախագահների հանդիպումը եւս մեկ քայլ կլինի ԼՂ հարցում հայկական դիրքորոշման ամրապնդման եւ ադրբեջանական կողմի դիրքորոշման մեկուսացման: Այս մասին NEWS.am-ի թղթակցի հետ զրույցում ասաց ԱԺ ՀՀԿ խմբակցության պատգամավոր Գագիկ Մինասյանը: Նա նշեց, որ տեւական ժամանակ է, ինչ բանակցային սեղանին դրված է մի փաստաթուղթ, որին հայկական կողմը համաձայնել է, իսկ ադրբեջանական կողմը տարբեր պատրվակներով փորձում է խուսանավել` իր համաձայնությունը չտալով: «Ադրբեջանն այդ վարգաքիծն է դրսեւորել` սկսած Սանկտ-Պետերբուգի հանդիպումից: Արդեն Աստանայի հանդիպման ժամանակ պարզ դարձավ, այդ քաղաքականությունը Ադրբեջանին տանում է դեպի միջազգային մեկուսացում, իսկ միջազգային հանրությունն ավելի եւ ավելի է հակվում դեպի այն դիրքորոշումը, որն ունի հայկական կողմը: Իսկ Սոչիի հանդիպումը եւս մեկ քայլ կլինի հայկական դիրքորոշման ամրապնդման ուղղությամբ»,-նշեց Մինասյանը:
Նա կիսեց այն մտահոգությունները, որ Սոչիի հանդիպումից հետո Ադրբեջանը կրկին կշարունակի իր ռազմատենչ հայտարարությունները եւ նախկինի պես սադրանքներ կհրահրի հայ-ադրբեջանական շփման գծում: «Ադրբեջանի տակից հողը փախչում է, եւ նրան այլ բան անել չի մնում: Ե՜վ եռանախագահող երկրները, ե՜ւ միջազգային հանրությունը ներկայացնում են խնդրի կարգավորման այնպիսի մոտեցումներ, որոնք չափազանց հեռու է այն խոստումներից, որոնք Ադրբեջանը տասնամյակների ընթացքում տվել է իր հասարակությանն ու մոլորության մեջ պահել»,-նկատեց ՀՀԿ-ական պատգամավորը: Նրա խոսքով` այսօր Ադրբեջանի իշխանությունը դարձել է իր հասարակությանը տված իր խոստումների գերին, եւ այդ պատճառով ի վիճակի չի ընդունել այն ողջամիտ որոշումները, որոնք ներկայացվում են միջազգային հնարության կողմից:
Հիշեցնենք, որ Հայաստանի, ՌԴ-ի եւ Ադրբեջանի նախագահների հանդիպումը տեղի կունենա մարտի 5-ին:
