Մարտի 5-ին Սոչիում կայանալիք Սարգսյան-Մեդվեդեւ-Ալիեւ հանդիպումից լուրջ ակնկալիքներ ունենալ չարժե: Այս մասին NEWS.am-ի թղթակցի հետ զրույցում ասաց ԼՂՀ Ազգային ժողովի ՀՅԴ խմբակցության ղեկավար Արմեն Սարգսյանը:
«Սպասելիքներ չկան երկու պարզ պատճառով. նախ, Ադրբեջանը պատրաստ չէ բանակցել, երկրորդ, այդ բանակցություններում ներկայացված չէ Լեռնային Ղարաբաղը։ Բացի այդ, նախագահների եռակողմ հանդիպման ձեւաչափը կարծես սպառել է իրեն»,- ասաց ԱԺ պատգամավորը։
Նրա խոսքով, վաղը կայանալիք հանդիպումը կարող է լուծել բացառապես մարտավարական, բայց ոչ՝ ռազմավարական խնդիրներ։ «Եռակողմ հանդիպման ընթացքում կամրագրվեն պատերազմ չվերսկսելու, բանակցային գործընթացը շարունակելու եւ նման այլ հարցեր, սակայն ռազմավարական խնդիրներ դժվար թե արծարծվեն»,- նշեց Արմեն Սարգսյանը։
Հարցին, թե հակամարտող կողմերի հետ հանդիպման ժամանակ ի՞նչ շեշտադրումներ կանի Ռուսաստանի նախագահ Դմիտրի Մեդվեդեւը, ՀՅԴ խմբակցության ղեկավարը նկատեց. «Նա, բնականաբար, կփորձի ցույց տալ, թե որքան ուժեղ է այս հարցում Ռուսաստանը եւ ինչ դեր կարող է ունենալ հիմնախնդրի կարգավորման հարցում։
Ինչպես ավելի վաղ հայտնել էր NEWS.am-ը, Հայաստանի նախագահ Սերժ Սարգսյանը մարտի 5-ին աշխատանքային այցով կմեկնի Սոչի։ Այցի շրջանակներում տեղի կունենա Հայաստանի, Ռուսաստանի եւ Ադրբեջանի նախագահների եռակողմ հանդիպումը։ Հանդիպումը կկայանա Ռուսաստանի նախագահ Դմիտրի Մեդվեդեւի նախաձեռնությամբ։
Նշենք, որ սա նախագահների՝ եռակողմ ձեւաչափով 8-րդ հանդիպումն է։