Հայաստանի Կենտրոնական բանկի խորհուրդն այսօր՝ մարտի 4-ի նիստում որոշել է բարձրացնել վերաֆինանսավորման տոկոսադրույքը 0.5 տոկոսային կետով` սահմանելով այն 8.25 տոկոս:
Ինչպես NEWS.am-ը տեղեկանում է ԿԲ մամուլի ծառայությունից, ստացված հաղորդագրության մեջ նշվում է, որ 2011 թ. փետրվարին արձանագրվել է 1.9 տոկոս գնաճ, որի արդյունքում 12-ամսյա գնաճը կազմել է 12.4 տոկոս:
ԿԲ խորհուրդը մտահոգված է գնաճային միջավայրի ընդլայնմամբ, ինչի շարունակականությունը պայմանավորված է պարենային եւ հումքային ապրանքների միջազգային շուկաներում վերջին ամիսների զարգացումներով, 2010 թ. գյուղատնտեսական ապրանքների առաջարկի կրճատման հետեւանքով դեռեւս պահպանվող բարձր գներով, վերջիններիս երկրորդային ազդեցությունների ուժգնացման եւ գնաճային սպասումների ավելացման երևույթներով:
Միաժամանակ, խորհուրդը գտնում է, որ տնտեսության զարգացման ներկա եւ կանխատեսվող միտումները առաջիկա ժամանակահատվածում չափավոր գնաճային ճնշումներ են ձեւավորելու:
ԿԲ խորհրդի կարծիքով՝ իրականանում են 2011 թ. առաջին եռամսյակի Դրամավարկային քաղաքականության ծրագրում նախանշված ռիսկերը եւ կանխատեսումները։ Հավատարիմ մնալով փետրվարին արված հայտարարությանը՝ ԿԲ-ն որոշեց շարունակել դրամավարկային պայմանների խստացումը:
Խորհուրդը գտնում է, որ դրամավարկային պայմանների աստիճանական խստացումը, պարտադիր պահուստավորման մեխանիզմում կատարված փոփոխությունները, պետական այլ կառույցների աջակցությունը հակագնաճային միջոցառումների իրականացման գործընթացում իրական նախադրյալներ կստեղծեն գնաճը 2011 թ. երկրորդ կեսից նպատակային միջակայք վերադարձնելու համար: