Հայաստանի եւ Ադրբեջանի նախագահների հանդիպումների մեծաքանակությունը եւ հաճախակիությունն ինքնին դրական տեղաշարժ է ԼՂ հակամարտության լուծման ճանապարհին։ NEWS.am-ի թղթակցի հետ զրույցում այս մասին ասաց Հանրապետական կուսակցության պատգամավոր Կարեն Ավագյանը։
Նրա խոսքով, Հայաստանի եւ Ադրբեջանի նախագահներ Սերժ Սարգսյանի եւ Իլհամ Ալիեւի այսօրինակ հանդիպումներն «այն եզրերն են, որտեղ կարելի է լուծումներ գտնել»։
Անդրադառնալով Հայաստանի, Ռուսաստանի եւ Ադրբեջանի ղեկավարների՝ մարտի 5-ին Սոչիում կայացած եռակողմ հանդիպման ընթացքում ընդունված համատեղ հայտարարությանը եւ հատկապես՝ դրա երկրորդ կետին (ձգտել բոլոր վիճելի հարցերը լուծել խաղաղ միջոցներով եւ կրակի դադարեցման գծի երկայնքով կողմերի մասնակցությամբ անցկացնել հնարավոր միջադեպերի հետաքննություն` ԵԱՀԿ Մինսկի խմբի համանախագահների հովանու ներքո եւ ԵԱՀԿ գործող նախագահի հատուկ ներկայացուցչի աջակցությամբ)՝ Ավագյանը նշեց. «Իրականում հակամարտության լուծման ճանապարհին սա քայլ առաջ է, որովհետեւ ղարաբաղաադրբեջանական շփման գծում դիպուկահարների հետ կապված խնդիրներ են առաջանում, ադրբեջանական կողմից դիվերսիաներ են լինում։ Համատեղ հայտարարության այս կետով կարծես ամրագրվում է որոշակի իրավական հարթություն, ինչը հնարավորություն կտա քննությամբ պարզել կոնկրետ գործողությունը»:
Նշենք, որ Հայաստանի Ռուսաստանի ու Ադրբեջանի նախագահներ Սերժ Սարգսյանը, Դմիտրի Մեդվեդեւն ու Իլհամ Ալիեւը մարտի 5-ին Սոչիում տեղի ունեցած եռակողմ բանակցությունների արդյունքում համատեղ հայտարարություն են ընդունել:
Երկու կեետից բաղկացած հայտարարության մեջ նշվում է.
1. Ամենակարճ ժամկետում ավարտել ռազմագերիների փոխանակումը
2. Ձգտել բոլոր վիճելի հարցերը լուծել խաղաղ միջոցներով եւ կրակի դադարեցման գծի երկայնքով կողմերի մասնակցությամբ անցկացնել հնարավոր միջադեպերի հետաքննություն` ԵԱՀԿ Մինսկի խմբի համանախագահների հովանու ներքո եւ ԵԱՀԿ գործող նախագահի հատուկ ներկայացուցչի աջակցությամբ: