Ընդդիմադիր «Ժառանգություն» խմբակցության պատգամավորները առաջիկա աշխատանքային օրը պատրաստվում են Հատուկ քննչական ծառայություն ներկայացնել հաղորդում հանցագործության մասին: Պատգամավորները պահանջում են քրեական գործ հարուցել մարտի 3-ին Հանրապետության հրապարակում տեղի ունեցած միջադեպի կապակցությամբ: Հանցագործության մասին հաղորդման տեքստն այս պահին մշակման փուլում է:
«Ժառանգությունը» հանցագործության մասին հաղորդման կրկնօրինակները հասցեագրել նաեւ հայաստանյան մի շարք բարձրաստիճան պաշտոնյաների, ինչպես նաեւ միջազգային կազմակերպությունների: Հարցին, թե ինչ ակնկալիքով են ներկայացնում հաղորդումը, դրան ընթացք կտրվի՞` «Ժառանգություն» խմբակցության պատգամավոր Արմեն Մարտիրոսյանը NEWS.am-ի թղթակցի հետ զրույցում հայտարարեց. «Ցանկացած պարագայում մենք գնալու ենք մինչեւ վերջ, դիմելու ենք հնարավոր բոլոր ատյաններին: Բոլոր մեղավոր մարդիկ, ոստիկանները պետք է պատասխան տան իրենց արարքների համար»: Արմեն Մարտիրոսյանին NEWS.am-ը հիշեցրեց, որ միջադեպից հետո ոստիկանության տարածած հայտարարության մեջ նշվում էր, թե «Ժառանգություն» պատգամավորները «սադրել են» Կառավարության շենքի մոտ հավաքված ցուցարարներին, փորձեցել են «բախումներ հրահրել ոստիկանների հետ»: Պատգամավորն արձագանքեց, թե բոլոր հարցերը կտրվեն դատարանում. «Ոստիկանությունը պետք է դատարանում ապացուցի այն, ինչի մասին ասվում է հայտարարության մեջ»,-նշեց նա:
Հիշեցնենք, որ մարտի 3-ին կառավարության շենքի մոտակայքում ոստիկանների եւ պատգամավորների միջեւ բախում է տեղի ունեցել: Ըստ ցուցարարների, մոտ 40 ոստիկաններ` Երեւանի փոխոստիկանապետ Ռոբերտ Մելքոնյանի գլխավորությամբ, հարձակվել են ակցիայի մասնակիցների վրա, քաշքշել ու հարվածներ հասցրել: Ոստիկանները չեն խնայել նաեւ կանանց: Ռոբերտ Մելքոնյանն անձամբ քաշքշել է Զարուհի Փոստանջյանին, իսկ ՀԱԿ-ի անդամ Վարդգես Գասպարին գետնին են տապալել, բռնություն կիրառել ու բերման ենթարկվել ոստիկանություն:Քաշքշոցի հետեւանքով, վատացել էր մի կին, ում շտապօգնության մեքենայով տեղափոխել էին հիվանդանոց: Դեպքի վայր էր ժամանել «Շտապօգնության» մեքենան, որի մեջ կտրուկ վատացել է Անահիտ Բախշյանի վիճակը եւ բժիշկները առաջին օգնություն էին ցուցաբերել նրան: Ոստիկանապետ Ալիկ Սարգսյանը հայտարարել էր, թե միջադեպի հետ կապված ծառայողական քննություն է նշանակելու:
