Այն փաստը, որ միջազգային հանրությունը, ի դեմս ԵԱՀԿ Մինսկի խմբի, վերջապես որոշել է դեկլարատիվ հայտարարություններից անցում կատարել կոնկրետ քայլերի՝ հետաքննություն նշանակելով շփման գծում, ուշացած գիտակցումն է այն բանի, որ ղարաբաղյան հակամարտության շուրջ բանակցությունները ռազմականացված են եւ գտնվում են ձախողման եզրին, NEWS.am-ի թղթակցի հետ զրույցում ասաց «Ժառանգություն» խմբակցության ղեկավար Ստեփան Սաֆարյանը։
«Հիմա միջազգային հանրությունը ուշացումով գիտակցում է, որ այսպես շարունակել չի կարելի եւ անհրաժեշտ է կոնկրետ քայլեր ձեռնարկել, հակառակ դեպքում բանակցային գործընթացը կձախողվի եւ անհնար կլինի խուսափել ռազմական գործողություններից»,- հայտարարեց պատգամավորը։
Նա միաժամանակ կասկած հայտնեց, որ ԵԱՀԿ Մինսկի խմբի հսկողության տակ օբյեկտիվ հետաքննություն կանցկացվի։
«Եթե շփման գոտում իրականացվող միջազգային հետաքննությունը օբյեկտիվ լինի, դա բավարար կլինի, որ Ալիեւը կանգնի միջազգային տրիբունալի առջեւ։ Սակայն նման բան, իհարկե, տեղի չի ունենա, եւ այս գործընթացը կավարտվի համանախագահների հերթական դեկլարատիվ հայտարարությամբ»,- ասաց պատգամավորը։
Նշենք, որ Հայաստանի, Ռուսաստանի եւ Ադրբեջան ի նախագահների՝ մարտի 5-ին Սոչիում տեղի ունեցած հանդիպման ընթացքում ընդունված համատեղ հայտարարության մեջ նշվում էր, որ ԵԱՀԿ գործող նախագահի անձնական ներկայացուցիչ Անջեյ Կասպրշիկի գլխավորությամբ պեռք է ղարաբաղա-ադրբեջանական շփման գոտում տեղի ունեցող միջադեպերի հետաքննություն իրականացվի։
